• La Xunta de Gobiernu aprueba 280.000 euros para’l Plan de Digitalización del Comerciu de Xixón

    https://psoegijon.es/la-xunta-de-gobiernu-aprueba-280-000-euros-paral-plan-de-digitalizacion-del-comerciu-de-xixon/?lang=ast

    La Xunta de Gobiernu, axuntada esta mañana telemáticamente, dio lluz verde a un conveniu cola Unión de Comerciantes del Principáu, por un importe de 280.000 euros, para la puesta en marcha de la segunda fase del Plan de Digitalización del Comerciu de Xixón, recoyíu nel alcuerdu ‘Xixón Reinicia’ suscritu polos axentes sociales y empresariales en xunu de 2020.

    La primer fase d’esti plan ( fase piloto) tuvo una duración d’ocho meses y desenvolvióse ente’l 1 de setiembre de 2020 y el 30 d’abril de 2021, coles mires de dar respuesta a la necesidá d’una digitalización masiva nes pymes xixoneses del comerciu de proximidá, mediantes el desenvolvimientu d’acciones en diversos niveles, asistencia personalizada y soluciones afeches a les necesidaes de cada empresa.

    Nesta segunda fase l’oxetivu ye estender el programa al restu de comercios de Xixón, la evolución del serviciu d’acompañamientu, la esperimentación de programes d’innovación, y la xeneración de comunidá ya identidá ente tolos actores del comerciu local (alministración, asociaciones, consultores, provisores de servicios, etc).

    D’esta forma, la fase 2 del Programa de Digitalización implica avanzar, siquier, de dos formes distintes: la primera, asemeyáu a la realizada na fase piloto cola incorporación de nueves empreses, y la segunda trabayando coles yá xuntaes pa dir ameyorando’l so programa de digitalización.

    Nel marcu del presente conveniu propónse desenvolver actuaciones que dexen conectar DIGICOM col Programa asturianu (DICA) pa, ente otres coses, conformar un Cluster d’Innovación en Comerciu ya incorporar al DICA les empreses xixonés que la deseyen.

    Coles mesmes, la Xunta de Gobiernu aprobó la prórroga del contratu de diseñu, suministru ya instalación d’allumáu ornamental navidiegu, solicitada pola empresa axudicataria, Germán Vizcaín S.L, el pasáu mes de febreru, pa los años 2021 y 2022, por un importe de 503.291’59 euros.

    A lo último, la Xunta aprobó la certificación final de les obres d’allugamientu de semáforos nes cruces de les cais Manuel Junquera y Leopoldo Alas, y -yos Cigarreres y Carretera Carbonera, según l’allugamientu d’un semáforu na avenida de José Manuel Palacio y el cambéu de regulación en Mariano Pola. Toes estes actuaciones fueron acometíes por un importe total de 82.389’33 euros.

    Share

Comments are closed.