Navigation

HISTORIA

El 2 de mayu de 1879, na tabierna Casa Labra de Madrid, el tipógrafu ferrolanu Pablo Iglesias Posse funda’l Partíu Socialista Obreru Español (PSOE). Naz asina’l que se diba convertir nún de los partíos de tradición obrera más vieyos d’Europa. Nuna sociedá como la española, peratrasada nel planu social y con un desenvolvimientu industrial mui ruin, el partíu consigue una implantación rápida en Madrid, Asturies y el País Vascu.

  • 2011-Actualidá

    Actualidá

    Depués de les elecciones municipales del 2011, el PSOE, anque ye la fuercia más votada, nun pudo formar gobiernu pol pactu ente les dos fuercies de la derecha y pasó a la oposición. Cuatro años más tarde, nel 2015, la negativa de les otres dos fuercies d’esquierda presentes nel Conceyu a favorecer un gobiernu de cambéu que dexare revertir les polítiques regresives del casquismu fixo que’l PSOE siga liderando la oposición a les fuercies conservadores na ciudá.

    El 26 de mayu del 2019 va ser el momentu en que’l trabayu realizáu nesta agrupación lleve a “Reiniciar Xixón”, al traviés d’Ana González, candidata a l’alcaldía.

  • 2007

    Casa del Pueblu nueva

    Inauguración de la sede actual de la Casa del Pueblu na cai L’Argandona, 4-Bis

  • 1990

    Casa del Pueblu San Bernardo

    El 15 de xunetu inaugúrase la sede histórica na cai San Bernardo, 53.

  • 1999-2011

    Paz Fernández Felgueroso, alcaldesa

    Encabezó’l primer gobiernu paritariu qu’hubo na ciudá, lo que supunxo un referente en toa España.

    Per un llau, consiguióse o completóse la creación de grandes equipamientos que se proyectaren dellos años atrás. Per otru, fíxose que Xixón se consolidare como una ciudá accesible, compacta, igualitaria, abierta y moderna. Nesi periodu nacieron el Xardín Botánicu Atlánticu, l’Acuariu de Poniente y el centru de Talasoterapia. Amás, desenvolvióse’l Parque Científicu Tecnolóxicu, que superó la barrera de los 2.000 trabayadores y estendióse hasta llegar a la zona del INTRA.

    Tamién se punxeron en marcha les escueles d’Educación Infantil de 0 a 3 años, señal del compromisu que’l socialismu siempre tuvo cola igualdá y la conciliación de la vida personal y profesional d’homes y muyeres, y creóse la Casa Malva, tou un finxu de les polítiques contra la violencia de xéneru. Al empar, Xixón convertíase nun referente turísticu de primer orde.

  • 1987-1999

    Vicente Alberto Álvarez Areces, alcalde

    A lo llargo de los sos trés mandatos encaráronse les inversiones más importantes en materia de saniamientu y construyéronse los grandes colectores que traviesen el subsuelu de la ciudá y fixeron posible resolver les llenes que se producíen en zones como la Puerta la Villa y les aveníes de la Costa o de Torcuato Fernández Miranda. Foron tiempos d’inversiones n’infraestructures básiques, visibles y non visibles.

    Tamién nesos años recuperóse la fachada marítima, tresformando’l muelle pesqueru y la zona industrial de Fomentu na playa de Poniente y la conocida hasta entós como playa de La Casera na playa de L’Arbeyal. Amás, Areces y el so equipu impulsaron decididamente’l campus universitariu y empezaron la urbanización del Parque Científicu y Tecnolóxicu, finalizaron la tresformación del barriu d’El Llano, desaniciando definitivamente’l chabolismu, y dieron los primeros pasos tanto na modernización de l’alministración local como na descentralización de servicios al traviés de los Centros Municipales.

  • 1979-1987

    José Manuel Palacio Álvarez, alcalde

    Palacio y el so equipu tuvieron que facer frente a un gran retu: constituyir el primer conceyu democráticu depués de cuarenta años de dictadura. Esto ye, poner de pies una institución a la que diba emponer una única máxima: satisfacer les necesidaes de la ciudadanía y solucionar los problemes que presentaba una ciudá qu’entá taba por construyir.

    Había qu’arrincar de cero, ponese al llabor y diseñar urxencies tan básiques como:

    • Rede d’Agua potable y saniamientu.
    • Llimpieza urbana (EMULSA).
    • Serviciu d’autobuses (EMTUSA).
    • Asfaltáu de cais.

    Yá daquella empezó a xestase’l primer planiamientu urbanísticu del Xixón contemporáneo. Pensáronse barrios como El Llano, Pumarín o La Peral, y empezó a desaniciase’l chabolismu, qu’entá yera un problema urxente. José Manuel Palacio foi l’alcalde que punxo los cimientos del Xixón que güei conocemos y disfrutamos.

  • 1979

    Primeres elecciones

    Gánense les primeres elecciones municipales democrátiques.

  • 1978

    Constitución

    El 8 d’avientu de 1978 la ciudadanía española aprobó, nun referéndum, una Constitución nueva.

  • 1939-1975

    Un partíu dividíu

    La derrota na Guerra Civil fixo medrar la división tan fuerte qu’empezare a añerar nel socialismu a lo llargo de los años del conflictu. El partíu fracturábase ente los partidarios de Juan Negrín y quien queríen más asumir les tesis, más moderaes, d’Indalecio Prieto. Na práctica eso traducióse na coexistencia de dos partíos socialistes nel exiliu. Prieto diba acabar reorganizando’l PSOE cola esclusión d’aquellos dirixentes que taben más lloñe de les sos tesis.

    N’España, el PSOE empezó a reorganizase en 1942, con 300 comités locales qu’actuaben en cárceles y campos de concentración. En 1944 formóse la primer Comisión Executiva nel interior, a la que diben prender cuatro meses depués sentando un precedente bien murniu. Les cinco executives que la siguieron foron esmantelaes y los sos dirixentes acabaron na cárcel. En 1953 el presidente de la Comisión, Tomás Centeno, foi asesináu pola Policía franquista nes dependencies de la Dirección Xeneral de Seguranza.

    Los años de la dictadura supunxeron un golpe duru pal Partíu Socialista. Pero los años de la persecución y la clandestinidá nun apagaron la llaparada del socialismu en Xixón. La unión d’esfuercios de veteranos y militantes mozos traducióse nel caltenimientu y desenvolvimientu de la organización nunos tiempos perescuros pa los demócrates españoles. Gracies a ellos pudo caltenese’l pulsu del partíu y del sindicatu hermanu, UXT, y con esti nucleu organizativu onde predominaba l’emburrie de los más mozos diba encarase la llegada de la democracia y del xuegu políticu llibre.

    Venceyaos a grupos clandestinos obreros del metal y la mina, munchos socialistes lluchaben na solombra por caltener viva la llaparada del socialismu. Un exemplu singular d’ellos foi’l compañeru Marcelo García y la so compañera Encarna. Llegó a participar nel famosu congresu federal de Suresnes qu’escoyó nel exiliu a Felipe González como Secretariu Xeneral del Partíu nuna clave que significó la renovación de la organización y la so modernización pa recuperar la memoria histórica y llegar a ganar les elecciones xenerales que nos diben otorgar el Gobiernu del país a lo llargo de munchos años de cambeos y tresformación.

  • 1936

    Primer alcalde socialista

    En 1936, unos pocos meses namás, la ciudá diba conocer al so primer alcalde del PSOE. Tratóse d’Ángel Martínez Pérez.

  • 1931

    Coalición Republicano Socialista

    Ente 1931 y 1936, sacante la etapa de control militar impuesta depués del fracasu de la revolución d’ochobre, Xixón tuvo gobernada pola Coalición Republicano Socialista.

  • 1911

    La llegada a la casa conceyu

    Los principios nun foron fáciles, y sí abegosos. Depués de dos décades d’esfuerciu y un llabor incansable, el PSOE sacó dos conceyales nes elecciones municipales de payares de 1911. Isidro Díez de la Torre y Manuel Bayón Varela convirtiéronse, asina, nos primeros representantes socialistes del Conceyu de Xixón.

  • 1902

    VI Congresu Federal

    El 22 d’agostu de 1902 fíxose, nel Teatru Xovellanos, el VI Congresu Federal del PSOE.

  • 1901

    Federación Socialista Asturiana

    Catorce agrupaciones, ente les que s’atopa Xixón, diben fundar el 27 de xineru de 1901 la Federación Socialista Asturiana.

  • 1891

    El surdimientu d’una agrupación municipal

    El periódicu El Socialista, nel so númberu 300, da cuenta de la constitución de l’Agrupación Socialista de Xixón. Yera’l 4 d’avientu de 1891. Un día depués diba celebrase nel Teatru Xovellanos el primer mitín, que s’usó pa dar a conocer el programa del partíu. Dellos meses más tarde, el 18 d’abril de 1892, la recién nacida Agrupación diba vese refrendada cola asistencia de Pablo Iglesias Posse a un mitín celebráu nos Campos Elíseos.

  • 1890

    Los anicios

    En 1890, el xixonés Francisco Cadavieco volvió a la so ciudá natal dende Bilbao, onde viviere y empezare la so militancia nel PSOE. Atopó acoyida n’El Natahoyo, una d’aquelles barriaes obreres surdíes al calor de la industrialización, xunto al matrimoniu formáu por Celestino Fanjul y Teresa Olay, que recibíen el nomatu de los Chispos. Ente los trés empezaron a esparder l’ideariu socialista na ciudá, con xuntes a la lluz de les veles en L’Atalaya onde se lleíen testos propagandísticos a los obreros asistentes.

Más información: http://www.psoe.es/conocenos/historia/

Share
Skip to toolbar