Xixón, 4 avi (EFE).-
El Plenu del Conceyu de Xixón aprebó esti miércoles 4 d’avientu’l proyectu de presupuestos pa 2020 que xube a 233 millones d’euros, un 2,5 per cientu más que les cuentes públiques de 2017, unes cuentes qu’afechen con dos años de prórroga.
El proyectu salió alantre en segunda votación colos sofitos de PSOE, IX, la oposición de Cs, PP y Vox y l’astención de Podemos, colo que foi’l votu calidable de l’alcaldesa, Ana González, el qu’inclinó la balanza a favor del sí.
Nel llau del gastu, el proyectu dedica un 23 per cientu a Urbanismu y Caltenimientu Urbanu y Rural; un 20 per cientu a Educación, Cultura y Deportes y un 10 per cientu a Bienestar y Derechos Sociales.
El presupuestu, que calcula unos ingresos corrientes de 210 millones d’euros, a los qu’hai que sumar un préstamu que ronda los 20 millones y les tresferencies corrientes, dedica 11,2 millones a inversiones reales y 7,9 millones a tresferencies de capital.
La conceyala de Facienda, Marina Pineda, afirmó que nun foi “fácil” ellaborar el proyectu, una y bones l’actual gobiernu atopó una alministración “paralizada” con una xestión económica “inesistente” que dió nun plan económicu financieru que afogó la inversión municipal dellos años.
“El presupuestu ye frutu de la negociación cola izquierda”, almitió Pineda, que recalcó que’l presupuestu sí ye “ideolóxicu”, porque “nun esisten presupuestos tresversales”, ya que les cuentes públiques reflexen les prioridaes d’un gobiernu y nesti casu, de les fuerces progresistes.
Frutu d’esta negociación con Podemos-Equo el presupuestu recupera la renta social gracies a xuna partida d’un millón d’euros y un compromisu políticu de destinar otru millón d’euros de los remanentes, de manera que pueda ponese en marcha n’abril de 2020.
Na negociación presupuestaria con Podemos tamién s’aprobó la gratuidá del serviciu de comedor pa les families que tienen a los sos fíos a media xornada n’escueles infantiles y tán nel primer tramu de renta y otros 100.000 euros pa ayudar a los usuarios d’esta etapa educativa.
El conceyal de Cs Rubén Pérez Carcedo consideró que’l proyectu ye “más de lo mesmo” y cuenta con más gastu corriente, menos inversión y una continuidá “absoluta” nes polítiques d’empléu y sociales hasta’l puntu de recuperar la renta social.
La vocera de Podemos, Yolanda Huergo, afirmó que les cuentes públiques son “un primer pasu tímidu” anque “esperanzador” a un modelu nuevu y encamentó al gobiernu a aprovechar el votu d’enfotu otorgáu por Podemos p’apostar por polítiques de cambiu porque, alvirtió, nun hai nin va haber un cheque en blancu.
Huergo consideró que’l proyectu ye “poco ambiciosu” y “nun ye más qu’actualización de gastos estructucturales depués de dos años de presupuestu prorrogáu”.
El voceru de Foro, Jesús Martínez Salvador, indicó que l’abrazu entre’l presidente del Gobiernu en funciones, Pedro Sánchez, y el secretariu xeneral de Podemos, Pablo Iglesias, treslladóse a Xixón pero afiguráu nun “abrazu ruinu de meñiques”.
Pela so parte, el so homólogu del PP, Alberto López-Asenjo, señaló qu’esti proyectu nun tien proyectu pa la ciudá del futuru y básase nuna mayor radicalidá”.
El de Vox, Eladio de la Concha, consideró que nesti presupuestos los grandes compromisos de Xixón siguen allancaos, faise caxa aumentando la carga fiscal de manera previa y nun se centra nes necesidaes concretes de los xixoneses.
Pela so parte, Aurelio Martín, d’IX, afirmó que l’aprobación de les cuentes públiques supon l’afitamientu del nuevu ciclu políticu que s’abrió na ciudá tres les elecciones municipales” y ponen fin a un escenariu de prórrogues presupuestaries y llimitaciones de gastu.