Ayeri martes tuvo llugar na Casa del Pueblu del PSOE de Xixón un alcuentru de la militancia con Adrián Barbón, en presentando’l pasáu llunes el so precandidatura a la Secretaría Xeneral de la Comisión Executiva Autonómica dientro del procesu congresual del 33º Congresu Autonómicu.
Tuvo acompañáu d’Iván Fernández Ardura, secretariu xeneral de l’Agrupación Municipal Socialista de Xixón quien-y estimó l’escoyer Xixón pa empecipiar la campaña informativa pa la recoyida d’avales, al igual que lo fixo va cuatro años cuando presentó’l so precandidatura a la Presidencia del Gobiernu d’Asturies.
Barbón estimó’l calor recibíu polos más de 70 compañeros y compañeres asistentes al actu, y animó-yos a participar nel procesu de primaries al traviés del so aval.
Na so intervención faló de los valores del partíu, de la importancia de la militancia, y de los principios qu’hai qu’integrar nel 33º Congresu Autonómicu como son la igualdá ente homes y muyeres, l’empléu xuvenil, la salú mental de les y los mozos y los derechos de la diversidá del colectivu LGTBI, ente otros. Coles mesmes, respondió a les entrugues de les persones asistentes sobre’l peaxe del Güerna, los problemes de conectividad nel mediu rural, la protección del llobu, la puxanza de la estrema derecha y la perda de los valores democráticos, los mensaxes de confrontación en redes sociales, según les nueves perspectives económiques que se abrir n’Asturies col procesu de descarbonización.
Nun quixo terminar ensin falar de la pandemia, una mal alcordanza que nun podemos escaecer poles más de dos mil muertes n’Asturies y los millones nel mundu, y “que si de daqué tiennos que sirvir ye de la importancia de lo público y de la importancia de que toles persones curiemos de toes”.