Noticia publicada nel diariu El Comerciu’l 16 de setiembre de 2020
L’alcaldesa punxo ayeri cifres al impactu sobro les cuentes municipales del refugu del Congresu al alcuerdu sobro l’usu de los remanentes que fuera alcordáu ente’l Ministeriu de Facienda y la Federación Española de Conceyos y Provincies, magar con una posición estremada nel senu d’esta postrera. «Con ese real decretu, Xixón tuviera accesu a 21 millones d’euros. Cola nueva propuesta -anunciada’l llunes pola ministra María Jesús Montero y que dexa en suspensu pa los conceyos el cumplimientu de la riegla de gastu- vamos poder aportar a 1,8 millones. La diferencia ye sustancial».
Ana González amosóse bien crítica con «quien se descolgaron del oxetivu común y, lideraos pol alcalde de Zaragoza, dexáronse llevar por una llucha partidista» y llamentó que como resultáu d’ello «güei como conceyu tenemos menos de lo que díbamos tener». Consideró la so actitú deslleal», por culpa de que en la xunta directiva de la FEMP l’alcuerdu col ministeriu saliera alantre, anque fuera col votu calidable, pal desempate, del so presidente y alcalde de Vigo, Abel Caballero. «Ye verdá que la votación foi apertada. Pero como nel fútbol, vale ganar con un gol. Y ganóse, porque’l votu calidable entra dientro de les riegles del xuegu». Fixo finalmente un llamamientu a la unión de tolos partíos «pa tener una política realmente municipalista y que los conceyu podamos gastar el nuesu dineru».
La rexidora recordó per otra parte que l’equipu de gobiernu sigue a la espera d’una propuesta de Podemos pa la renta social. Y avanzó que pela so parte yá cunten con una «en fase embrionaria que tien que ver cola fienda dixital». Esplicó que, más allá de les necesidaes de munchos neños pa poder realizar les sos xeres escolares, «vemos qu’en persones de mediana edá y mayores unu de los déficits pa la empleabilidá y p’el mesmu día ente día ye l’analfabetismu dixital, que torga dende pidir una cita previa al traviés del ordenador a rellenar nel móvil un formulariu pa Servicios Sociales.