Xixón, 1 oct (EFE).- L’alcaldesa de Xixón, Ana González, estimó al PP que decidiera sofitar el nuevu conveniu del plan de víes, yá que ye necesariu sumar fuerces para desbloquiar el proyectu y poder empezar a falar d’obres en 2023 o 2024.
Asina lo afirmó preguntada pola decisión del PP de Xixón de tender la mano al gobiernu col nuevu conveniu si s’avien a axustar una serie d’elementos que refuga del testu presentáu la selmana pasada pola alcaldesa y qu’asitia la nueva estación en Moreda.
González amosóse “bien estimada” al PP, yá que ye necesariu “avanzar y desbloquiar esta cuestión” dempués de que la decisión de llevar la estación al Muséu de Ferrocarril, tomada sol mandatu de Foro, fixera que’l proyectu volviera al caxellu de salida”.
“Precisamos xunir fuerces para emburriar y que los tiempos nun se repitan”, sostuvo la rexidora al respective de los retrasos qu’atropen el plan de víes y la construcción de la estación intermodal, una y bones el primer conveniu ta fecháu en 2002.
L’alcaldesa amosó la so intención de que “lo más aína haya plan de víes y metrotrén, un oxetivu que se materializa en que nesti mandatu tienen de quedar les coses “lo suficientemente zarraes”, lo que pasa por tener financiamientu o bien avanzaes les negociaciones para poder empezar a falar de construyir en 2023 o 2024.
Preguntáu poles crítiques de Ciudadanos a la falta de financiamientu, González afirmó qu’apura conformar l’equipu con representantes del Ministeriu, Principáu y Conceyu que s’encargue d’atopar el financiamientu.
El sofitu del PP al nuevu conveniu bastió esta selmana la baxa del partíu del exportavoz popular Alberto López Asenjo que tamién ye conseyeru en Xixón Al Norte, sociedá encargada del plan de víes.
La so nueva condición de conceyal non adscritu “va suponer dellos cambeos”, afirmó l’alcaldesa, quien afirmó qu’hai qu’analizalos cumpliendo cola llegalidá vixente y falando con López-Asenjo y el PP.
González, que nun quixo entrar en cuestiones orgániques de partíos, afirmó que siente ciñu por López-Asenjo como pol presidente del PP de Xixón, Pablo González, y amosóse confiada en que toos van tratar esta crisis interna con “absolutu respetu” al Conceyu. EFE