El Conceyu de Xixón empecipia güei, llunes 16 de payares, les obres de cambéu del trazáu del carril bici de Poniente al so pasu polos edificios barcu’, que se va treslladar a la cai Mariano Pola por onde va escurrir en llínea recta.
D’esta miente, se redistribuirá la circulación ciclista escontra los barrios de Moreda y El Natahoyo, ameyorando la conexón de la rede de carriles y ciclocarriles en dirección a los barrios de la zona oeste. L’oxetivu d’esta intervención ye precisamente buscar una alternativa que respete y pacifique la movilidá piatonal y ciclista na zona.
Por ello, cola cuenta de facilitar el tránsitu de ciclistes y peatones, va enllantase un tramu de carril bici con unu anchor de 2,5 metros y una cera de formigón semipulida amiesta al mesmu na zona de verde próxima a los antiguos xulgaos. Nesa esquina, tamién se va ampliar el radiu de xiru de los vehículos que precisen aportar a los garaxes, de los taxis y de los servicios del Acuariu.
Coles mesmes, va rebaxase la cera esistente para llevar a cabu la correcta transición ente’l carril bici de la cera y la calzada, cumpliendo colos criterios d’accesibilidá de la normativa vixente.
Esta actuación forma parte del proyectu de meyora del carril bici en Xixón urbanu axudicáu en Xunta de Gobiernu’l 22 de setiembre a Alvargonzález Contratas por un preciu de 199.995’76 euros I.V.A incluyíu que’l so plazu d’execución ye de dos meses.
Cabo recordar que’l proyectu citáu contempla tamién la execución de la reposición de firme del carril-bici de Puerto Vegarada, la conexón del carril bici sobro les víes del tren ente’l carril bici de l’Avenida Juan Carlos I y la rotonda de la Estación Xixón-Sanz Crespo debaxo de Carlos Marx. Coles mesmes esti contratu inclúi les intervenciones pa facilitar la incorporación de los ciclistes nes cruces de l’Avenida del Llano cola cai Pérez de Ayala, l’Avenida Gaspar García Laviana cola cai Cataluña, con Cai Roncal y cola cai Leoncio Suárez, la carretera de Ceares cola cai Juan Botas, según la intervención puntual en carriles bici esistentes p’ameyorar el firme ya iguar de defectos del trazáu.