L’aumentu de la presión asistencial y del númberu d’andaes por coronavirus alzó de trés a cuatro’l nivel d’alerta n’Asturies lo que llevó al Gobiernu rexonal a anunciar que va adoptar de manera inmediata nueves midíes para acutar la movilidá y les interacciones sociales.Tres ocho díes nos que se detectaron más de 3.000 andaes y nos que s’alzaron los finaos, hospitalizaos en planta y en UCI, el gobiernu asturianu aseguró güei que la situación na rexón “ye crítica”.
La presión asistencial esistente en dellos hospitales plantega la necesidá de poner en marcha nueves midíes de contención y por eso les autoridaes sanitaries tán trabayando na definición de nueves midíes que van ser consensuaes col Ministeriu de Sanidá y el comité de crisis d’Asturies”.
Estes midíes van tar empobinaes a “intensificar l’amenorgamientu de la movilidá y de la interacción personal· para evitar l’aumentu de casos que traigan una repercusión nel sistema sanitariu, anunció’l Principáu, que precisó qu’estes midíes van poner en marcha lo primero posible posible.
El director de Salú Pública, Rafael Cofiño, esplicó qu’Asturies pidió al gobiernu central un confinamientu aperturista» similar al de la fase 1 que «llinde la movilidá». Nesti sentíu yá se decidió (va entrar a valir el día 4 de payares) suspender la educación universitaria y l’actividá comercial non esencial. Esto ye, namá van poder siguir abiertos comercios como supermercaos o tiendes de primera necesidá.
«Les midíes que tamos plantegando ye la vuelta a la fase 1, con zarru de tola actividá non esencial». Cofiño numberó toles restricciones que van entrar a valir dende’l miércoles: «Suspensión d’actividá de negocios minoristes, salvu esenciales. Suspensión d’actividá comercial en grandes superficies y centros comerciales. Suspensión d’actividá presencial na Universidá. Suspensión de congresos, xuntes, seminarios y conferencies. Suspensión d’espectáculos públicos y recreativos».
Pela contra, les actividaes que queden exentes del zarru son comercios d’alimentación, de bébores, d’artículos de primera necesidá, farmacies, parafarmacias, óptiques, prensa y revistes, estancos, talleres, ITVs, equipos tecnolóxicos, tintoreríes, llavanderíes, peluqueríes o recoyida de comíes.
Sí se va caltener en marcha, «pero con control estrictu de les normes sanitaries», la educación «dende cero años hasta los cursos de Bachilleratu y FP».