Saltar al contenido
Portada » Últimas Noticias » Axúntense dos mil persones en Xixón pa ver a Pedro Sánchez

Axúntense dos mil persones en Xixón pa ver a Pedro Sánchez

El secretariu xeneral del PSOE, Pedro Sánchez, nel actu políticu celebráu en Xixón nel qu’intervieno al pie de Adriana Lastra, Adrián Barbón y Ana González argumentó que “ye mui importante que movilicemos tolos socialistes y progresistes, pero tamién a tolos españoles que quieren una España cabal, enllena de sentíu común, que quiera conquistar el futuru, y nun recular 40 años, que ye lo que ta proponiendo la derecha”.

“Toos a votar el 28-M, porque a lo que ta xugando la derecha ye a l’astención, porque saben que si hai movilización el PSOE ganará por goliada. Por eso tenemos que movilizanos el 28 d’abril: para avanzar y nun recular”.

Amás,  la nuestra candidata Ana González empezó’l so discursu agorando un trunfu socialista’l 28A: “Vamos ganar porque tamos nun momentu crucial de la hestoria y negámonos a que nos la vuelvan a arrampuñar”. Tres censurar “tolo que fixo la derecha pa intentar frenar al gobiernu de Pedro y el PSOE”, concluyó que “esto ye imparable y nun nos van frenar, vamos camudar España, Asturies y Xixón, la España del negro pasó, nun va volver, agora tou dir a ver en color”. Nun escaeció la candidata a l’alcaldía de Xixón reclamar un aplausu d’homenaxe al fináu Tini Areces y recordar la visita del presidente del Gobiernu, esta tarde, a la Casa Malva pa reivindicar que “nós somos el compromisu cola igualdá y nun faemos la semeya de la vergüenza”.

Pela so parte, Adrián Barbón recalcó que les ufiertes de la FSA-PSOE a la ciudadanía son “la seriedá que, cola que ta cayendo n’otros ámbitos, yá ye enforma, seriedá que da estabilidá política a Asturies”. Enfrente, “qué tenemos na derecha”, preguntóse: “los que se pasen de modernos y cuando faen primaries salen más votos que votantes”. Y remachó, “lo del PP d’Asturies ye un auténticu vodevil y nun hai película de Almodóvar que lo supere”.

La vicesecretaria Adriana Lastra enfatizó que “somos el gobiernu que precisa Asturies” mientres el so discursu, recordando que “cuando llegamos al gobiernu l’executivu del PP unviara un plan de zarru de la minería ensin que naide lo supiera y güei, gracies al gobiernu socialista y a Pedro, los 1.000 trabayadores d’Hunosa siguen n’Hunosa, y pa siguir porque vamos invertir por que sía la empresa referente en reactivación y modernización n’Asturies porque ye clave’l nuesu apueste pol Principáu y la del presidente del gobiernu”. Tamién dexó claro que “gracies a qu’aprobemos, en solitariu, un real decreto Alcoa y les empreses electrointensivas tienen futuru n’Asturies y en toa España, gracies a Pedro Sánchez”.

 


X