Artículo d’opinión publicáu en La Nueva España’l miércoles 14 d’ochobre
Preguntábase apocayá’l conceyal del Partíu Popular nel Conceyu de Xixón, el señor Alberto López-Asenjo, por qué los socialistes sentíamonos acosaos en tomando midíes que tienen como principal oxetivu beneficiar y ameyorar la salú de los nuesos vecinos y vecines, y al empar volvía calificar al gobiernu municipal de dictadura socialista. Interesada manera la de preguntar daqué y respondese coles mesmes con descalificaciones.
Llueñe de considerar un escesu eses declaraciones, añede agora que la dictadura socialista qu’imaxina ye de calter arquitectónicu marxista, ta dirixida por un politburó, remembrando asina l’estilu soviéticu de gobiernu, anque calificándolo de cortixu para da-y quiciabes un toque más castizu.
Partiendo del supuestu bienintencionado de que la desbordante imaxinación del representante del Partíu Popular nun-y lleva al estáu de nublar la so visión de la realidá y que, poro, nun cree realmente qu’esta ciudá tea dirixida por una dictadura del proletariáu, sinón por un gobiernu municipal lexítimamente constituyíu que toma les sos decisiones dientro del máximu respetu a les normes democrátiques, entiendo que lo que pretende’l señor López-Asenjo con tal desaxeración ye a cencielles denunciar una supuesta falta dialogo del equipu de gobiernu de la ciudá.
Resalva que la ciudadanía xixonesa valida con un usu xeneralizáu’l nuevu espaciu puestu a la so disposición nel Muriu -bien al contrariu de lo que s’agoraba-, que numberosos colectivos ciudadanos consideren necesaries estes actuaciones y que en munches de les iniciatives desenvueltes nel ámbitu de la movilidá que ta impulsando’l Conceyu de Xixón/Xixón, introduciéronse cambeos sobro les propuestes iniciales, en realizándose cuantes xuntes fueren necesaries. La mesma plataforma creada a costa fecha pa oponese a esti cambéu, actuando al marxe de les asociaciones vecinales de la zona, que como ye bien sabío nun comparten el so criteriu, foi recibida tantu polos representantes del gobiernu municipal como polos responsables orgánicos del PSOE.
Convien, por tanto, recordar una vegada más que nun compartir los criterios del señor López-Asenjo nun nos fai a les y los socialistes nin menos demócrates nin más radicales, a cencielles discrepamos nuna acción que creemos necesaria al dar mayores garantíes pa la salú y el bienestar de la xente. Sí, sicasí, ye esmolecedor que pela so parte s’utilice un tonu cada vez más despreciatible con quien representen a opciones distintes, o a cencielles con quien manifiesten opiniones que nun coinciden coles suyes.
Ye ciertu que vivimos momentos políticos bien polarizados nos que per parte de la derecha política tou convertir n’escusa pa la confrontación y el bloquéu, y bonalmente dicir al señor conceyal del PP: creo que yá tenemos abondo d’eso na política española. Podemos aldericar sobro lo que fai o plantega’l gobiernu municipal, tamién sobro les distintes alternatives p’atender les demandes y aspiraciones del nuesu conceyu o, otra manera, dedicar tolos esfuerzos a ponenos etiquetes con palabres esaxeraes y vacíes. Ye probable que la ciudadanía valore más lo primero que lo segundo, pero de daqué non cabo la menor dulda: que depende de cada unu lo que podamos o queramos apurrir a Xixón. Les y los socialistes apostamos claramente pol alderique públicu democráticu, esto ye, pol diálogu, pero ensin aburuyar la realidá presente con vieyos estigmes llaraos de dictadures y desaxeraciones.
Iván Fernández Ardura
Secretariu Xeneral
Agrupación Municipal Socialista de Xixón