El Centru complementa les sos instalaciones con un área de autocaravanas y seis puntos de recarga para vehículos eléctricos, y estudia el desenvolvimientu d’una estación de serviciu de suministru de gas
El Conseyu d’Alministración del Centru de Tresportes de Xixón, axuntáu esta mañana de forma telemática, aprobó un presupuestu para 2021 de 836.851 euros col votu a favor de PSOE (1), IU (1) y los conseyeros del Gobiernu d’Asturies (6), l’astención de Ciudadanos (1), Foro (1) y PP (1), y el votu en contra de VOX (1). Coles mesmes, el conseyu dio’l vistu bonu la conxelación de les tarifes para’l próximu exerciciu col únicu votu en contra de VOX.
La xunta tuvo presidida pol conceyal de Mediu Ambiente y Movilidá, y presidente de la sociedá, Aurelio Martín, y nella haise dáu cuenta de los datos d’ocupación de les instalaciones, lo mesmo que de les meyores acometíes na cortil y de los nuevos servicios puestos en marcha o en proyectu.
D’esta manera, nel añu 2020, el númberu d’abonaos del Centru de Tresportes amontóse un 7,21%, la ocupación de parceles y espacios polivalentes creció un 50% y la de naves pasó del 83,50% de 2019 al 100% actual.
En cuanto al plan de meyora de les instalaciones, el centru reformó los vestuarios y los aseos, reabrióse la cafetería so la xestión d’una nueva empresa concesionaria y con nuevos servicios, esaniciáronse los desperfectos nel firme de la entrada norte, y na actualidá tán rematando los trabayos de señalización viaria de la cortil. La nueva páxina web, integrada nel portal municipal gijon.es, tamién dexó actualizar la información disponible que s’ufierta a los usuarios del centru y a la ciudadanía. Amás, la sociedá xuntóse al contratu pa la xestión integral ya intelixente del allumáu, edificios ya instalaciones del Conceyu de Xixón.
Per otru llau, mientres l’añu 2020 el Centru de Tresportes amplió los sos servicios con un área pal estacionamiento de caravanes y autocaravanas que cunta yá con 11 usuarios, y robló un contratu con Ecolineras S. L. pa la instalación de 6 puntos de recarga pa vehículos eléctricos que va tar operativu la próxima primavera. El centru tien previstu tamién formalizar dos contratos pa la ocupación d’espacios publicitarios y l’instalación de dos antenes de repetición 5G de telefonía móvil.
El Conseyu d’Alministración foi amás informáu de les negociaciones abiertes cola compañía petrolera Q8 Energy Red S. L., en presentando esta un proyectu pal desenvolvimientu d’una estación de serviciu de suministru de gas, según un llavaderu de camiones y una tienda. La inversión per parte de la empresa xubiría a 992.480 euros ensin incluyir tases nin impuestos.
Tantu los nuevos servicios puestos en marcha, como’l proyectu mentáu enantes formen parte de la estratexa empresarial del Centru de Tresportes pa diversificar la so actividá, potenciar los usos de les instalaciones y xenerar nuevos ingresos.