Nota de prensa, 12/04/21
El Conceyu de Xixón va abrir el martes día 13 d’abril, una consulta ciudadana nel Portal de Participación de la páxina web municipal www.gijon.es, coles mires de conocer la opinión de la ciudadanía de cara a ellaborar un Reglamentu de Llaicidá.
El Consistoriu considera necesariu regular el mandatu constitucional de aconfesionalidad y neutralidá relixosa, nel ámbitu municipal, y por esti motivu empecipia una consulta ciudadana que va permanecer abierta hasta’l próximu 3 de mayu, tal que recueye la Llei de Procedimientu Alministrativu y el mesmu Reglamentu del Plenu, nel so artículu 98.
Tal que establez la Constitución Española, ye necesariu garantizar la llibertá ideolóxica, relixosa y de cultu de la ciudadanía, de manera que les creencies relixoses nun constituyan motivu de desigualdá o discriminación énte la llei.
Nesti sentíu, l’interés municipal ye regular cuestiones tan importantes como la separación ente’l poder público municipal y les distintes confesiones relixoses y/o convencimientos personales, y l’obligatoriedá del poder públicu municipal énte’l fechu relixosu.
Les entrugues plantegaes na consulta son dos. Per un sitiu ¿cómo crees qu’han de ser les relaciones ente’l Conceyu y les distintes confesiones relixoses?, y por otru, ¿qué cuestiones crees que sería necesariu incluyir nuna regulación del usu d’espacios públicos y edificios municipales, pa garantizar el mandatu constitucional de neutralidá relixosa?