El Conceyu de Xixón/Xixón hai delimitado les franxes horaries de les salíes a la trama urbana, incluyendo nésta a Somió y Roces yá que la so población supera los 5000 habitantes.
D’esta miente, les vecines y vecinos del restu de la zona rural del conceyu pueden practicar deporte y pasiar a cualquier hora del día, cumpliendo siempres colo establecío na orde dictada pol Ministeriu de Sanidá y publicada nel Boletín Oficial del Estáu. Esto significa que, anque nun s’impongan veces, solo van poder faelo una vegada al día, ente les 06.00 y les 23.00 y, nel casu de los paseos, nun se van realizar a una distancia cimera a un kilómetru respecto a la casa. Nesti sentíu, l’Alcaldesa de Xixón, Ana González Rodríguez, recordó que siguimos en confinamientu y ye necesariu siguir los encamientos establecíos, ente elles, salir lo menos posible de casa.
Na zona urbana, por tanto, cabo recordar que la práctica de deporte individual y los paseos solo van poder llevase a ente les 6.00 hores y les 10.00 hores y ente les 20.00 hores y les 23.00 hores. Aquelles persones dependientes y les que son mayores de 70 años van poder faelo ente les 10.00 hores y les 12.00 hores y ente les 19.00 hores y les 20.00 hores. Les neñes y los neños, al pie de un adultu responsable, tienen la posibilidá de circular peles víes o espacios públicos ente les 12.00 hores y les 19.00 hores pa realizar un paséu diariu, d’una hora de duración máximu y a menos d’un kilómetru de la casa del menor. Cabo recordar que solo se pueden realizar estes salíes una vegada al día.
González Rodríguez resaltó la importancia d’atenese a estes normes pa poder garantizar la distancia de seguridá y evitar asina andaes por Covid-19. Amás, fixo un llamamientu a la responsabilidá individual de la ciudadanía pa siguir avanzando positivamente nes fases de la desescalada.
Les zones rurales exentes d’horarios por tener menos de 5000 habitantes son les siguientes: Veriña, Puao, Fresno, San Andrés de los Tacones, Serín, L’ Abadía de Cenero, Ruedes, Porceyo, La Pedrera, Llorio, San Martín de Güerces, Llavandera, Fano, Valdornón, Caldones, Santurio, Vega, Granda, Castiello de Bernueces, Cabueñes y Deva.