Nota de Prensa, 9 de marzu de 2021
Movilidá va enllantar tamién un pasu de peatones en Sanz Crespo y va instalar un semáforu nel encruz de la carretera de La Coría cola avenida Mar Cantábricu
El Conceyu de Xixón va dar continuidá al corredor piatonal ente’l parque Teodoro Cuesta y l’avenida de Portugal, habilitando un pasu de peatones eleváu pa facilitar un tránsitu directu escontra la cai Infiesto. L’oxetivu ye dotar de seguridá a un itinerariu piatonal cada vegada más utilizáu nos desplazamientos ente’l barriu de Laviada y la zona de Poniente. Pa ello estudiaráse, amás, el soterramientu de los contenedores allugaos nesi puntu o’l so desplazamientu.
Asina lo esplicó’l conceyal de Mediu Ambiente y Movilidá, Aurelio Martín, na Comisión celebrada esta mañana, na qu’informó d’otres dos actuaciones. La primera relativa a la implantación d’un pasu de peatones na cai Sanz Crespo, al altor de la Dirección Xeneral de Tráficu, pa facilitar l’accesu piatonal a los xardinos del Tren de la Llibertá. va faese aprovechando’l semáforu esistente.
La segunda va consistir na instalación d’un semáforu nel encruz de la carretera de La Coría cola avenida Mar Cantábricu, coles mires de regular la intensidá del tráficu esistente en dambes víes en sentíu escontra la rotonda de la carretera de Ceares. El serviciu de Movilidá yá enllantara xuna señal de stop pa dar prioridá a los vehículos que s’incorporen dende l’avenida Mar Cantábricu, pero la midida considérase agora insuficiente.