Nota de prensa, 26 de xineru de 2021
La previsión de xenerar el Ximielgu Dixital Urbanu va dexar a Cimavilla alzase nel xerme de la tecnoloxía al serviciu de la ciudá para tol conceyu
El Conceyu de Xixón va empecipiar la revisión del Plan Especial de Cimavilla, aprobáu’l dos de xunetu de 1992, incluyendo’l de Protección y Reforma Interior del Cuetu de Santo Catalina, que la so aprobación definitiva data de marzu de 1987, daes los tresformamientos y cambeos habíos nos ámbitos regulaos, y teniendo en cuenta tamién los actuales oxetivos xenerales de rexeneración, rehabilitación y renovación urbana que deriven de la normativa comuñal y nacional.
Información apurrida pol conceyal d’Urbanismu, José Luis Fernández, na Comisión celebrada’l 26 de xineru de 2021.
Na actualidá, y dada el tresformamientu sufiertu pol barriu, incluyendo la conocencia qu’a día de güei tiense de la realidá arqueolóxica y hestórica que subyace nél, ye necesariu analizar en fondura les previsiones de dambos planes y la so posterior concreción por aciu midíes que fixeron del conxuntu, un espaciu distintu al analizáu nel so día, fai 30 años.
Dichu analís va producise partiendo d’un estudiu pormenorizáu de los oxetivos establecíos nel so día, cumplíos o non, para redefinilo y formular propuestes d’actuación, meyora y adaptación a los nuevos usos que se vienen plantegando pol tresformamientu xeneral del barriu y tamién de la ciudá. La estratexa d’usos de Tabacalera, la pista polideportiva cubierta, la continuidá de la Casa Natal de Xovellanos o la implantación del Conseyu Consultivu na Casa de Nava, son dalgunos de los exemplos a tener en cuenta, xuníos a la implantación d’usos hosteleros-hoteleros sobro’l Puertu Deportivo y nuevu espacios culturales como l’antiguu abelugu aéreu o les casamatas del Cuetu.
Igualmente resulta necesariu afaer el planiamientu a les nueves condiciones d’accesibilidá universal, con especial incidencia nuna orografía d’importantes rimaes nos tránsitos piatonales, que tien de dar respuesta a les crecientes necesidaes de les comunidaes vecinales, poniendo l’espaciu públicu al serviciu de la ciudadanía.
Va Ser imprescindible, coles mesmes, incluyir nesta revisión la xeneración del Ximielgu Dixital Urbanu, que va dexar nueves técniques de representación de la información sobro les edificaciones, espacios verdes, movimientos de persones y vehículos, o xacimientos y restos arqueolóxicos. Modelos como l’entamáu na ciudá alemana de Herrenberg, van contribuyir a una planificación urbana sostenible, a amontar la seguridá nel barriu, tantu la de la ciudadanía como la de los sos principales elementos definidores, y van dexar que Cimavilla se erija nel xerme del Ximielgu Dixital Total del conceyu y, por tanto, de la tecnoloxía al serviciu de la ciudá.