El próximu 21 de xunu celebrará’l Día del Refuxáu con un actu que va ser presencial y va poder tamién siguise telemáticamente
El Conseyu municipal para la Cooperación y la Solidaridá, celebráu esta mañana, dio’l vistu bonu a les bases para la convocatoria de subvenciones d’anguaño, destinaes a Organizaciones Non Gubernamentales, que se van desenvolver en réxime de concurrencia competitiva y tendrá d’aprobar la Xunta de Gobiernu.
Esisten cuatro llínees de subvenciones qu’en total suman 1.360.000 euros, y son les siguientes:
- Llínea 1. Cooperación al Desenvolvimientu. Dotada con 1.050.000 euros, esta llínea va dirixida a la realización d’acciones de cooperación, solidaridá, promoción y afitamientu del desenvolvimientu económico y social en países aprobetaos, que tengan por oxetu la meyora de les condiciones de vida, la igualdá ente muyeres y homes, y el desenvolvimientu de los sos propios recursos naturales, técnicos y humanos.
- Llínea 2. Territorios palestinos. Dotada con 100.000 euros, esta llínea va dirixida a aquelles organizaciones que, colos mesmos oxetivos de la llínea 1, desenvuelvan la so acción en Palestina.
- Llínea 3. Educación pal desenvolvimientu y la sensibilización. Dotada con 50.000 euros, ta dirixida a la realización d’acciones ya intervenciones empobinaes a la sensibilización de la sociedá polo xeneral, o sectores en particular, que promuevan actitúes de compromisu solidariu, al traviés de la organización de xornaes, alcuentros, esposiciones o conferencies. Dientro d’esta llínea van tener prioridá los proyectos que sopelexen los Oxetivos de Desenvolvimientu Sostenible (ODS) y l’Axenda 2030.
- Llínea 4. Ayuda Humanitaria. Dotada con 160.000 euros, ta destinada a a la execución de proyectos que dean respuesta a situaciones nes que la seguridá, los derechos humanos y el bienestar de comunidaes o grupos tean en riesgu, por causes derivaes de desastres naturales (hinchentes, seques, seísmos, pandemies…) o aquelles derivaes de l’acción humana (guerres, persecuciones, persones abelugaes o movíes…)
El Conseyu de Cooperación encetó tamién l’actu conmemorativo del Día del Refuxáu, que van tener llugar el próximu 21 de xunu, que va cuntar cola intervención d’una representante del Comité Español d’Ayuda al Refuxáu, lo mesmo que de delles persones abelugaes que van cuntar la so esperiencia. Tamién se van proxectar dos curtiumetraxes sobro esta temática y va cuntase cola actuación d’una cantautora. L’actu podrá siguise de manera presencial y tamién per vía telemática.
La concejala de Cooperación, Carmen Saras, destacó que, tanto les bases de la convocatoria de subvenciones como l’actu del día del Refuxáu, entamáronse dende la Conceyalía en collaboración col grupu de trabayu de persones abelugaes con presencia n’el mesmu Conseyu.