La concejala de Facienda, Marina Pineda, presentó esta mañana la prórroga presupuestaria para 2021, que’l so decretu va roblar Alcaldía a lo llargo del día de güei, con una previsión de gastu total de 227.808.623’12 euros.
Tal que esplicó la concejala de Facienda, el gastu total previstu col decretu de prórroga supera en dos millones al que taría disponible si iguárase un proyectu presupuestariu para l’añu que vien.
Amás del decretu de prórroga, Pineda presentó la primer propuesta de cambéu presupuestariu al traviés del remanente líquidu de tesorería, que tien por oxetu suplementar los creitos iniciales de la prórroga y xube a 13’3 millones d’euros.
Dientro d’esta propuesta, el Gobiernu Municipal inclúi cuatro millones d’euros para la puesta en marcha de programes alcordaos na Mesa de Concertación, 500.000 euros para programes d’Innovación ó 400.000 euros destinaos a programes de Mediu Ambiente y Movilidá. Sicasí, l’equipu de gobiernu tamién plantega incluyir nesta partida casi 4’6 millones d’euros p’amontar les aportaciones a Organismos Autónomos y empreses municipales, destacando sobremanera 2.781.700 euros pa la Fundación Municipal de Servicios Sociales.
A esta propuesta de cambéu, plantegada a los grupos políticos na Comisión de Facienda celebrada esta mañana, habría que sumar otros 20 millones d’euros de préstamu, destináu a cubrir los capítulos d’Inversión. Les prioridaes nesta materia son, por casu, l’impulsu al proyectu de Tabacalera; los accesos a Cimavilla; redolaes escolares seguros; meyores en carriles bici; o meyores n’edificios ya instalaciones d’usu ciudadanu, como instalaciones deportives, centros municipales o’l Parque d’Isabel La Católica.
Adicionalmente al préstamu pa inversiones, la propuesta del equipu de gobiernu pasa pol compromisu de destinar dos millones d’euros más del Remanente Líquidu de Tesorería a inversiones, pa Distritos (un millón d’euros); Parque d’Isabel La Católica (460.000 euros); reforma de viviendes sociales (250.000); meyores nes redolaes de centros escolares (100.000); alquisición de fondos pa biblioteques públiques (40.000 euros); y adecuación de carriles bici (50.000 euros)