El Conceyu va someter a información pública nun mes el protocolu específicu d’actuación n’episodios de contaminación del aire para la zona
El plan d’acción al curtiu plazu para l’amenorgamientu de los niveles de partícules en suspensión na atmósfera de la zona oeste de Xixón, aprobáu’l pasáu vienres pol Conseyu de Gobiernu, inclúi ente les sos midíes l’adelantu a 2022 de la inversión pa la instalación d’un nuevu filtru nel sínter B secundariu de ArcelorMittal.
La midida, tal que esplicó’l conceyal de Mediu Ambiente, Aurelio Martín, na Comisión de Seguridá, Movilidá y Mediu Ambiente celebrada esta mañana, respuende a les conclusiones del estudiu realizáu pola consultora Troposfera. Esti estudiu establez que de les emisiones procedentes de los dos sínter de la fábrica de ArcelorMittal en Veriña (con dos focos d’emisión caúna), son les del sínter B secundariu les que mayor influencia tienen nos niveles de partícules PM10 rexistraos na zona del Lauredal.
Esta ye la razón pola Principáu d’Asturies decidió obligar a la empresa a adelantrar la inversión, prevista primeramente pa 2024, pa lo que va dar en realizar d’oficiu’l cambéu na Autorización Ambiental Integrada de la instalación.
D’esta manera priorízase la inversión nel sínter B secundariu respectu al primariu, que se va realizar en 2024, al ser el focu más contaminante y al alegar la empresa la inviabilidad d’acometer los cambeos nos dos circuitos de forma simultánea como yá asocediera nel sínter A.
Una vegada aprobáu’l plan per parte del Principáu, el Conceyu trabaya agora nel borrador del protocolu específicu d’actuación n’episodios de contaminación del aire pa la zona. va someter a información pública nun mes y, en siendo aldericáu colos grupos políticos en Comisión, va aprobase la Xunta de Gobiernu nun plazu de trés meses.
El conceyal de Mediu Ambiente informó, amás, que va ser entós cuando Principáu y Conceyu constituyan la Mesa de Diálogu Ciudadanu prevista ente les midíes de plan pa sirvir como preséu de siguimientu y control.