Los conceyos van tener especial importancia na mesa redonda que va cerrar la xunta, na que ta prevista la presencia de representantes de Llanes, Villaviciosa, Peñamellera Baxa y l’asociación ACASTUR
El Xardín Botánicu Atlánticu de Xixón va acoyer un alcuentru técnicu internacional sobro’l plumeru de la pampa. Tratar de la 4ª xunta del grupu de trabayu de llucha contra esta especie invasora, tamién conocida como cortaderia selloana, que se celebra per primer vegada n’Asturies, promovida pol equipu de LIFE STOP Cortaderia.
El conceyal de Mediu Ambiente y Movilidá, Aurelio Martín, y el director xeneral de Mediu Natural, David Villar, van presentar l’alcuentru que se va celebrar de manera semipresencial y va poder siguise en directu al traviés de la canal de Youtube del Conceyu.
Va Cuntar cola presencia de Tomás Y. Diaz, Catedráticu de Botánica y redactor del plan de xestión del plumeru n’Asturies; con Rubén Rodríguez, técnicu de la dirección xeneral de Mediu Natural encargáu de la realización de les acciones d’eliminación del plumeru nel Principáu.
Amás, Santiago García, coordinador de LIFE STOP Cortaderia va encetar cómo se tán desenvolviendo los llabores d’eliminación d’esta invasora na comunidá de Cantabria, onde los trabayos realicen gracies al trabayu de persones con discapacidá.
Antonio Urchaga de SEO/BirdLife va esplicar los métodos más apropiaos pal control del plumeru, y Juan Carlos Martínez, Xefe de Serviciu de Parques y Xardinos de Xixón, va desenvolver les meyores na llucha contra’l plumeru realizaos pol conceyu.
Los conceyos van tener especial importancia al traviés de la mesa redonda que va cerrar la xunta, na que ta previstu que participen representantes de Llanes, Villaviciosa y Peñamellera Baxa, y l’Asociación ACASTUR.
La ciencia formal y la ciencia ciudadana van tener cabida na xunta cola presencia de Teresa A. Centenu del INCAR, que va esplicar les meyores científiques del procesu de inertización de granes de plumeru por aciu carbonización hidrotermal.
Per otru llau, Henrique N. Alves, del Conceyu portugués de Gaia, va esponer les técniques más novedoses pa la cartografía dixital del plumeru. La participación de la ciudadanía va ser tratada por Jose María Rozada, vecín de La Fresneda, que la so Sextaferia dedicada al plumeru lliberó al conceyu de la plaga, según por Blanca Serrano de SEO/BirdLife y Silvia Martins de la Escuela Agraria de Coimbra.
LIFE STOP Cortaderia ye un proyectu financiáu pola Comisión Europea. La so finalidá principal ye la eliminación de la planta invasora plumeru de la pampa de los espacios protexíos costeros de la Rede Natura 2000 de Cantabria y la contención de la so espansión escontra l’interior de la rexón. El promotor principal y cofinanciador d’esti proyectu ye la Conseyería de Desenvolvimientu Rural, Pesca, Alimentación y Mediu Ambiente del Gobiernu de Cantabria, en cooperación con una alianza de ONG sociales (Amica, AMPROS y SERCA) y ambientales (SEO/BirdLife).
En Cantabria, LIFE STOP Cortaderia cuenta tamién cola participación y cofinanciación de les empreses Astander, Solvay y Viesgo, el Conceyu de Santander y el Ministeriu de Tresportes, Movilidá y Axenda Urbana nel ámbitu de les sos carreteres. Amás, LIFE STOP Cortaderia estiende les sos acciones a otros territorios del arcu atlánticu européu, como Galicia y Portugal, gracies a la participación de la Xunta de Galicia, el conceyu de Vila Nova de Gaia y l’Escuela Cimera Agraria del Institutu Politécnicu de Coimbra.