XIXÓN, 21 (EUROPA PRESS)
L’ALCALDESA DE XIXÓN, Ana González (PSOE), abogó esti llunes por que, agora que se tán faciendo planes específicos dende l’Estáu y Gobiernu del Principáu, el Conceyu perfilara daqué empobináu a pequenos “subsectores escaecíos”.
Asina lo indicó, en declaraciones a los medios de comunicación tres tomar de posesión de la nueva secretaria municipal, a los que dio d’exemplu los feriantes o axencies de viaxes.
“Yo toi esmolecida”, reconoció la rexidora xixonesa sobre la situación d’estos subsectores que, según ella, quedáronse fora de les ayudes daes pa cubrir perdes pol impactu de les midíes de la COVID-19.
L’alcaldesa animó, nesti sentíu, a ser conscientes de que lo tán pasando “entá peor”, con relación a que siempres se tiende a pensar en comerciu y hostelería como los más afectaos, cuando otros tamién lo tán.
Daqué que rellacionó col alderique que se ta teniendo nel marcu de la concertación social sobro la propuesta del Gobiernu local de poner en marcha unos bonos d’ayuda al consumu, onde l’Alministración local abonaría una parte de les compres.
Estos bonos van tener distintes cuantíes, yá que, según palabres de l’alcaldesa, nun ye lo mesmo dise a tomar un café qu’a cenar o dir a un espectáculu. Distinta cuantía, amás, porque se van a dirixir a distintes realidaes, según ella.
A esti respectu, aludió a la distinta visión qu’hai ente quien conforma l’alcuerdu de concertación social, magar cree qu’adulces se van llimando aspereces y la midida va ganando adeptos, anque haya quien cree que’l pactu local nun sía’l marcu fayadizu.
González incidió en qu’ayudes a los sectores más afectaos pola pandemia yá les hai, pero estes esixen unos requisitos qu’igual non tol mundu puede cumplir.
A la so manera de ver, son requisitos “bien estrictos”. Sicasí, el sistema de bonos puede llegar a tol mundu y a sectores que lu teníen más complicáu p’aportar a una ayuda.
Ye por ello que consideró que la idea de los bonos ye positiva y “bien redistributiva”, yá que llega a muncha xente. Una midida que yá se punxo en marcha n’otros llugares, gobernaos por distintos signos políticos.
L’alcaldesa indicó que cola Renta Social Municipal había 300 comercios xuntaos y coles recién ayudes directes aprobaes más d’un centenar. Sicasí, colos bonos l’efectu económicu ye “multiplicador” porque a lo que pon el Conceyu súmase lo que pon el consumidor.