Discurso de l’alcaldesa de Xixón, Ana González Rodríguez, na inauguración de la 64 edición de la Feria internacional d’Amueses d’Asturies (FIDMA):
Bones tardes.
Creo bonalmente que nesti salón, realmente toi segura de que tol mundu sabe –sabemos- que, a lo llargo de la so hestoria, la Feria Internacional d’Amueses d’Asturies foi muncho más qu’una simple feria y más qu’un certame comercial consolidáu col refuerzu popular; refuerzu popular que lo convirtió nun multitudinariu acontecimientu branizu nel ecuador de los branos xixoneses. (Y tamién sabemos como son los branos xixoneses.) La Feria foi tamién, cada vez más, un vistosu y allegáu escaparate de l’actividá industrial, empresarial y comercial n’Asturies.
Sesenta y cuatro años de FIDMA que la fixeron un rexistru fiel y vivo de la hestoria económica, social y humana de Xixón y del restu del Principáu.
Asina, al repasar la hestoria del certame, repásense tamién la sucesión de meyores, cambeos, conflictos y crisis, formes de vida y de relación, inclusive los deseos y los pruyimientos de la rexón que cada añu allega masivamente a esta cortil para esibir los sos productos, cerrar tratos comerciales, llucir el güei o l’ayeri de les sos ciudaes y pueblos, trazar proyectos institucionales o cenciellamente, convivir nuna activa y bullente ciudá dientro de la ciudá, una Asturies viva y a escala. Un Xixón vivu y a escala.
La Feria Internacional d’Amueses d’Asturies ye esto primero de too: el llugar añal d’alcuentru d’Asturies, de toes y tolos asturianos, en cada momentu de la so hestoria recién. De la mesma que ye un llugar d’alcuentru coles nueses comunidaes vecines y colos visitantes veraniegos. Pos nunca foi frontera, siempres acoyimientu.
Creo qu’anguaño esti llugar d’alcuentru ye, sobremanera, una frontera. Non, non, nun toi contradiciendo. Déxenme que m’esplique. La sesenta y cuatro edición de la FIDMA ye frontera sí ; una llende que, igual que Xixón ye una llende onde Asturies s’asoma al horizonte del Cantábricu y abre asina tou un camín, la rexón tien d’asomase esta vegada al horizonte del optimismu. La raya, esta frontera, ye la que dixebra’l doliosu pasáu recién del futuru nel que tenemos yá un pie porque lu hemos fechu posible. Baste pel momento un datu: el 73% de la población asturiana ta yá vacunada con pauta completa.
Esta frontera, como-yos dicía, ye la que marca la divisoria ente l’últimu añu y medio de dolor, de perdes primero de too humanes, de restricciones, de paralís forzosu de la vida social y económico a toles escales, y el momentu de la esperanza y l’optimismu, el momentu de la recuperación económico y social y de regresu acordáu y prudente y coles mesmes decidíu, a la sienda del dinamismu y la reactivación en tolos frentes.
El territoriu de la FIDMA hai de ser anguaño’l llugar onde empecemos a percibir con tola so fuerza la voluntá y los recursos pa realcontranos; les empreses colos sos veceros, y les persones ente elles. Ye’l contraste ente lo aveseo y dolioso del silenciu y el vacíu que nestes mesmes feches ocupaben esta cortil el pasáu añu y la cazumbre que vuelve circular por cais y pabellones d esta cortil ferial.
Esta Feria d’Amueses va ser, poro, la del realcuentru, la de la esperanza, la de la recuperación del enfotu en nós, en nós; nes nueses empreses, industries y comercios. Hai de ser el llugar onde, como siempres, tomemos el pulsu al momentu históricu d’Asturies y a la so actividá económica y vitalidá social. Y tamién va ser el meyor llugar posible por que, quien la visitemos, amosemos el nuesu sofitu efectivo y afeutivo a tol texíu económico asturianu que torna colos sos productos y los sos servicios a esta cortil.
Nos nuesos paseos pola Feria vamos saber lleer, a la vista de los sos pabellones y estands, l’enorme esfuerzu que fixeron pa sobrevivir a los efectos de la pandemia, pa sacar fuerces de flaqueces, p’afaese nun exerciciu almirable de resiliencia, d’innovación, d’adaptación y de coraxe. Este ye’l bien más preciáu, el productu más pervalible que s’esibe anguaño na Feria: les ganes, la fuerza y la puxanza de tolos sectores económicos asturianos pa encarar una crisis mayúscula. El pixín fechu de que tean equí de nuevu ye’l meyor argumentu pa esa esperanza y esi optimismu del que falo.
Pela nuesa parte, como Conceyu de Xixón y toi segura de que ye un mensaxe unánime de tola corporación, queremos unviar ese mesmu mensaxe a toles asturianes y asturianos, y bien en particular a la ciudadanía de Xixón. Ye obviu qu’estos dos años hanse vistu fondamente afectaos polo que nos asocedió por igual a escala planetaria; pero tamién he de dicir que les demandes y necesidaes apremiantes que reveló l’impactu de la covid-19 fortaleciéronnos pa saber que precisamos, que tenemos que sumar, nunca restar y que tenemos d’anteponer la solidaridá y la corresponsabilidad.
La pandemia sorrayó con trazos entá más gruesos qu’a prioridá ye ganar un Xixón cada vez más pa les persones, convertir la ciudá nun ámbitu de relaciones, convivencia y curiaos ente les persones y de la redolada. La Feria d’Amueses d’anguaño ye, en ciertu mou, un bon emblema d’esa política de ciudá; yá nos lo diz el magníficu cartelu d’esta edición d’Avelino Mallo tituláu “Horizonte verde”. Porque, de la mesma que, anque allegaren empreses y comerciantes, nun hai Feria posible ensin les persones, de la mesma que la Feria d’Amueses son les persones que la visiten y nun puede ser otra manera, nun hai ciudá ensin persones.
Esi ye’l paradigma de ciudá nel que creemos y que defendemos, pol que trabayamos. Ye una visión claro y estenso que comparten otres ciudaes del mundu: Bilbao, Valladolid, París, Copenhague… Nun hai namás importante nuna ciudá que les persones que la habiten, y el nuesu cometíu ye recuperala dafechu pa elles, recuperando tamién el vieyu modelu renacentista d’una ciudá concebida a escala humana na que sía posible y prioritariu, aprovir el so bienestar, cubrir les sos necesidaes, empezando poles más apremiantes, ameyorar día ente día la so calidá de vida y la calidá de la so redolada.
Nesi tresformamientu sosprendiónos la pandemia, y nesa mesmu tresformamientu, pero si quepe con más convencimientu y ahínco, ye na que tamos nesti momentu. Xixón –como tan claramente amosó de cutiu esti certame– foi y ye una ciudá moderna, avanzada, inquieta, proxectada al futuru, deseosa d’abrir caminos y marcar enclinos; pero, inclusive antes de la gran convulsión d’anguaño y medio, la ciudá travesó dalguna etapa de apatía y estancamientu, de planes arrumbados y falta d’ambición ya idees. Nun ta na so naturaleza, como nun ta na naturaleza d’esta cortil permanecer zarráu, inactivu o llancáu en vieyes fórmules.
La FIDMA ye, como siempres, un escelente exemplu y estímulu; un espeyu fiable de la vitalidá que nesti momentu precisamos. Del optimismu y l’esperanza de les que, agora sí, tenemos que dexanos arimar nun momentu nel que gracies a les vacunaciones y al civismu de la inmensa mayoría podemos empezar a ser conscientes de que la covid-19 empieza a ser una enfermedá más controlada y normalizada. Volvieron al ferial empreses, industries, comercios, instituciones… y sobremanera volvemos les persones. Porque lo que va amosar anguaño la Feria d’Asturies, la so meyor conteníu van ser, primero de too, los sos pabellones y les sos cais poblaes por persones, cumpliendo coles midíes de seguridá, y esfrutando de la Feria. Ye’l testimoniu históricu que nesti momentu correspuende dar, y el que vamos recibir pa, cuando se cierren les sos puertes, siguir alantre.