El Conceyu de Xixón incorpora a les funcionalidades de la APP ‘Xixón’ el pagu de cualquier tipu de recibu municipal y la xestión de dellos servicios. D’esta miente, el pagu de tributos, sanciones y otros ingresos de derechu públicu puede realizase de forma axilosa, rápida y senciella, garantizando siempres la seguridá de les transacciones. Coles mesmes, el calter multifuncional d’esta ferramienta dixital vese reforzáu cola posibilidá de contratar y xestionar los abonos deportivos y la reserva d’instalaciones al traviés de los dispositivos móviles en cualquier momentu.
Per otru llau, para facilitar el so usu, l’aplicación dexa venceyar y trabayar con delles tarxetes ciudadanes de distinta titularidá, una fórmula que puede resultar bien útil para families.
Trátase, por tanto, d’una ferramienta vivo y multifuncional con diverses prestaciones como la solicitú de cites previes presenciales y telefóniques en tolos centros y servicios municipales de Xixón cola posibilidá de consultar y anular aquelles reservaes. Amás, dexa la contratación d’abonos tresporte mensuales, semestrales o añales, la consulta d’información sobro les llínees, el cálculu de rutes o la selección de paraes favorites; recargar y consulta de la tarxeta ciudadana y de los últimos movimientos realizaos con ella; según la solicitú de volantes d’empadronamientu cola so unviada inmediata al corréu electrónicu de contactu de la usuaria o usuariu. Tamién puede aportase al espaciu d’Empléu.
Cabo recordar que 19.539 persones yá se beneficien de les múltiples prestaciones d’esta aplicación del Conceyu y dende el so llanzamientu, en xunu de 2020, el númberu de descargues nun paró de crecer.
La APP ‘Xixón’ puede descargase de forma gratuita pa dispositivos móviles Android y IOS y el so usu tamién ta disponible n’al traviés de la versión incorporada a la web municipal.