Nota de Prensa, 26 de xineru de 2021
La Xunta aprobó les bases de la convocatoria del Plan Local d’Empléu 2021-2022, enmarcaes nes subvenciones del Serviciu Públicu d’Empléu del Principáu d’Asturies, que nesti casu ye de 3’425 millones d’euros, distribuyíos en dos añalidaes de 1.712.500 euros caúna.
El Plan d’Empléu 2021/2022 va dexar al Conceyu la realización de 155 contratos d’un añu de duración, y ente colectivos especialmente desfavorecidos dende’l puntu de vista del accesu al empléu. Ello ye que 69 d’estes contrataciones van tar acutaes pa persones mayores de 45 años, y otres 21 pa persones pertenecientes a families perceptores del Salariu social Básicu o Ingresu Mínimu Vital. Les bases contemplen amás, de forma preferente nel procesu selectivu, otres circunstancies qu’atienden a condiciones económiques o sociales característiques de los colectivos vulnerables. El períodu de solicitú abrirá’l miércoles, 27 de xineru hasta’l 9 de febreru. A partir d’esa fecha empecipiará’l períodu de selección de los as participantes, que va facer posible la contratación, previsiblemente, mientres los meses de marzu o abril de 2021.
Amás, la Xunta de Gobiernu dio lluz verde a 170 nueves ayudes enmarcaes nel programa de recuperación económica ‘Xixón Reinicia’, por un importe total de 215.939’32 euros. Con esta nueva aprobación, el númberu de solicitúes ye de 1.434, esto ye, un 54’55%, por un importe total de 2.015.202’38 euros. D’esta forma, el Conceyu sigue trabayando na tramitación d’estes ayudes, enmarcaes nun programa “absolutamente prioritariu pal equipu de Gobiernu, y que recibió un total de 2.629 solicitúes.
Per otru llau, diose conformidá a la instalación de cinco pantalles LCD en soportes tipo mupi, presentada pola empresa JC Decaux España S.L, axudicataria del contratu pa la instalación, caltenimientu y esplotación de soportes d’información, marquesines y demás elementos urbanos d’interés y usu públicu. Cola implantación d’esta tecnoloxía, la empresa ufierta al Conceyu de Xixón l’ampliación de les sos canales de comunicación, acutando’l 10% del tiempu total d’emisión pa la información municipal.
Coles mesmes, aprobáronse les reformulaciones de les solicitúes presentaes poles Organizaciones Non Gubernamentales qu’allegaron a les subvenciones nel marcu de la convocatoria d’ayudes de cooperación al desenvolvimientu del añu 2020 del Conceyu, por un importe de 1’4 millones d’euros.
El plazu de presentación de solicitúes pa esta convocatoria, que cunta con cuatro llínees de subvención, remató’l pasáu 11 de payares, estableciéndose un plazu de diez díes arteros pa la presentación d’allegamientos y, con calter voluntariu, la reformulación de los proyectos encuadraos nes llínees 3 y 4 (Educación pal Desenvolvimientu y Ayuda d’emerxencia Humanitaria, respectivamente); y venti díes arteros pa la reformulación, tamién con calter voluntariu, de los proyectos qu’allegaben a les llínees 1 y 2 (Cooperación al Desenvolvimientu y Territorios Palestinos, respectivamente). Asina, la Xunta de Gobiernu aprobó la reformulación de los proyectos presentaos por un total de 14 ONG´s, que se detallen de siguío:
- Agrupación de Sociedaes Asturianes de Trabayu Asociáu y Economía Social-ASATA (Llínea 1)
- Cáritas Diocesana Uviéu (Llínea 1, Llínea 2 y Llínea 4)
- Fundación Entreculturas-Fe y Allegría (Llínea 1)
- Asociación Harambee (Llínea 1)
- Fundación Nueves y Desenvolvimientu (Llínea 1)
- Asociación PROYDE (Llínea 1)
- Asociación Pueblo y Dignidá (Llínea 1)
- Asociación Remar Candás (Llínea 1)
- Asociación pa la Cooperación SERONDA (Llínea 1)
- Asociación Soldepaz Pachakuti (Llínea 1)
- Asociación Solidaridá Médica España (Llínea 1)
- Asociación SOS Burundi (Llínea 1)
- Asamblea de Cooperación pola Paz (Llínea 2)
- Expoacción Organización Solidaria (Llínea 3)
Tamién se llevantó la suspensión temporal de les obres de renovación de ceres nel barriu de Pescadores, axudicaes en septiembre a Alvargonzález Contrates S.A, dientro del contratu de Caltenimientu y Meyora de la Infraestructura Viaria, por un importe de 60.493’21 euros. La Xunta de Gobiernu del pasáu 30 d’avientu decidió suspender estes obres mientres dos meses, por cuenta de les condiciones climatolóxiques adverses qu’enzancaben el so desenvolvimientu. Tres la emisión d’un informe del Serviciu d’Obres Públiques, el pasáu 24 de xineru, que propón la so continuación, la suspensión de diches obres llevántase.
Per otru llau, la Xunta aprobó, primeramente, el Plan Especial promovido pola mercantil ALISEDA, S.A.O, coles mires de constituyir, xuntu coles de la so redolada, un nuevu barriu na ciudá, enllenando’l vacíu ente l’autopista y l’Avenida d’Uviéu. Amás introduz un axuste pa recoyer la realidá física de les parceles ya incorporar les dotaciones destinaes a espacios llibres.
El PGO preve nesti ámbitu la adscripción de 16. 238 m2 a sistemes xenerales. La promotora propón adscribir dos parceles que suman 6.000 m2 y que formen parte del Parque de los Periconos, polo que restaríen 10.238 m2 a adscribir al ámbitu. Sicasí, teniendo en cuenta los suelos yá esistentes cola calificación de sistemes xenerales, propón concretar esa adscripción segregándola d’una parcela de 32.173 m2 nel Campus Universitariu, na Milla de la Conocencia Margarita Salas, que la so llogru ye d’interés prioritariu pa la ciudá.
A lo último, la Xunta de Gobiernu aprobó tamién, de manera inicial, el Plan Especial-Estudiu pa la instalación d’un centru d’animales de compañía sobro parte d’una finca asitiada nel Monte Deva. Esta finca ta calificada como suelo non urbanizable d’interés agroforestal, incluyendo 725 metros cuadraos de camín que nun son de propiedá del promotor, pero que la so situación llegal nun s’alteria ya inclúyese p’ameyorar l’accesibilidá y los servicios. Considérase amás xustificada la necesidá d’edificar una vivienda venceyada a l’actividá, que tendrá de derrumbar en casu de cese de la mesma, recuperando la parcela. L’espediente va someter a un periodu d’información pública de dos meses.