La Xunta de Gobiernu, axuntada esta mañana de forma telemática, aprobó la decimoquinta riola d’ayudes del programa ‘Xixón Reinicia’ para la reactivación económica y el caltenimientu del empléu local, na que se conceden un total de 137 ayudes, por importe de 216.191’13 euros. D’esa cuantía, 203.830’43 euros van empobinaos a la llínea 1, al caltenimientu del empléu por cuenta ayena, y 12.360’70 euros a sufragar los gastos derivaos de la reapertura negocios, esto ye, a la llínea 2.
Per otru llau, alcordóse caltener la vixencia del contratu del serviciu de preparación y repartida de notificaciones y correspondencia del Conceyu, los sos organismos autónomos, la Empresa Municipal de la Vivienda, el Centru Municipal d’Empreses y Divertia, hasta que se formalice’l que se ta tramitando anguaño.
Coles mesmes, envaloróse’l recursu de reposición interpuestu contra’l resolvimientu de retirada d’una terraza hostelera, instalada en suelu quitáu la cai Gloria Fuertes, y conceder asina de nuevu la so instalación. Al propietariu correspuéndelu l’usu y esfrute de la portalada onde taba allugada, tal que figura na escritura de propiedá horizontal del edificiu y l’escritura de compraventa del local. Amás, disponía de llicencia concedida por resolvimientu de 11 de xineru de 2021.
A lo último, revócase l’ayuda para la execución del proxecto Caltenimientu de les instalaciones y viales del Parque Empresarial de La Peñona, yá que nun se rellenaron los requerimientos de documentación para xustificar los gastos subvencionaos. L’importe d’esta subvención ye de 5.000 euros y foi concedida’l 11 d’avientu de 2019 nel marcu de la convocatoria d’incentivos para les árees empresariales públiques de Xixón.