La Xunta de Gobiernu del Conceyu de Xixón dio’l vistu bonu a l’axudicación a Remana del contratu de xestión integral ya intelixente de los servicios enerxéticos y allumáu públicu y l’esplegue del internet de les coses na ciudá.
La contratación va tar financiada al traviés del fondu européu d’eficiencia enerxética (FEEE) por 184,6 millones d’euros, informó en rueda de prensa la vocera municipal, Marina Pineda.
Amás, concedióse a Ferrovial accesu a la documentación non confidencial presentada por Acciona para acreditar el cumplimientu de los requisitos previos.
Per otra parte, aprobóse axudicar a Caja Rural un préstamu de 6,4 millones para financiar la compra a la Tesorería Xeneral de la Seguridá Social de la finca “La Formigosa” para l’ampliación del Parque Científico y Tecnolóxico.
Amás, alcordóse conceder 85.000 euros en subvenciones para impulsar entidaes de xestión colectiva y la realización d’actuaciones empobinaes a caltener y ameyorar les condiciones de serviciu nes árees empresariales ya industriales de titularidá pública del conceyu de Xixón.
La Xunta tamién dio conformidá al conveniu de 186.000 euros cola Asociación Musical Banda de Música de Xixón para la realización de conciertos y actividaes de promoción y fomentu de la música de banda como parte de la tradición xixonesa.