La Comisión Técnica va aprobar a finales de febreru la programación añal y va dar a conocer la propuesta de nuevu conservador.
El Gobiernu local estudia les opciones de captación de fondos para proyectos venceyaos al Xardín Botánicu, según les posibilidaes d’ampliación.
Nota de prensa, 28 de xineru de 2021
El Conceyu de Xixón dio la so conformidá a la propuesta realizada pola Universidá d’Uviéu para nomar director científicu del Xardín Botánicu Atlánticu al investigador Borja Jiménez-Alfaro.
Doctor en Bioloxía pola Universidá d’Uviéu, ye personal docente ya investigador nesta institución y trabaya na Unidá Mista d’Investigación en Biodiversidá, adscrita al CSIC, nel campu de la ecoloxía de la vexetación y el caltenimientu, cuntando con una amplia trayectoria investigadora na que destaca’l so papel como principal impulsor de les bases de datos europea y global sobro vexetación, y los sos trabayos sobro l’usu de granes natives na restauración ecolóxica.
Jiménez-Alfaro desenvolvió amás numberoses estancies investigadores y docentes en distintes universidaes europees, ye autor de cuatro llibros de divulgación científica y participó en programes de radiu y televisión con fines divulgativos.
Tal que establez el conveniu robláu ente Conceyu y Universidá, el nuevu director va tener un 50% de dedicación a les funciones de dirección científica del Xardín Botánicu, ente les que s’atopen la dirección de los proyectos y del personal investigador, la collaboración na programación y organización d’acciones formatives y actividaes de marcáu calter científicu o divulgativu, y el visáu del informe añal d’actividaes científiques ellaboráu pol conservador.
El nuevu director científicu del Xardín Botánicu participó yá na xunta celebrada’l pasáu xueves 21 de xineru ente Conceyu y Universidá, na que s’alcordó convocar la Comisión Técnica que preside’l conceyal de Mediu Ambiente y Movilidá, Aurelio Martín, a finales de febreru, coles mires d’aprobar la programación y el presupuestu añal, y conocer la propuesta de la Universidá sobro’l nuevu conservador.
Per parte del Conceyu, amás del conceyal de Mediu Ambiente y Movilidá, formen parte de la Comisión Técnica’l director xeneral de Mediu Ambiente y Movilidá, y el xefes de serviciu de Vixilancia y Calidá Ambiental, Parques y Xardinos, y Protección y Educación del Mediu Natural. Esti postreru, que se va incorporar nes próximes selmanes una vegada remate’l procedimientu pa la provisión de la plaza, va ser el responsable del Xardín Botánicu.
Pela so parte, la Universidá cunta con otros cuatro representantes, incluyíu’l director científicu.
El conceyal de Mediu Ambiente y Movilidá, Aurelio Martín, treslladó esta información a los grupos políticos na Comisión de Seguridá, Movilidá y Mediu Ambiente celebrada esta mañana, na que tamién avanzó la intención del gobiernu local d’esquizar les opciones de captación de fondos europeos pa proyectos venceyaos al Xardín Botánicu. La Conceyalía de Mediu Ambiente y Movilidá ta tamién estudiando les posibilidaes d’ampliación del equipamientu.