El Comerciu, 19 de xunu de 2020
L’alcaldesa promete atender los pidimientos del barriu más allá de la construcción del colexu y el consultoriu Nuevu Roces cumple xuna década de vida y, a esa edá, como dixo l’alcaldesa, Ana González, «yá pueden tenese munches coses». Ayeri, empezaron por una más bien simbólica, pero necesaria p’acabar colos problemes de movilidá pa comunicase col barriu de Contrueces: una pasarela.
Esta plataforma, que los vecinos esperaben dende 2016, añu nel que se plantegó, supon «romper col aislamientu d’esti barriu», señaló la rexidora. Ella, al pie de dellos neños de la zona, rompió la cinta p’abrir el pasu a esta ponte que crucia sobre l’autovía del Cantábricu.
Pela so parte, el presidente de l’Asociación de Vecinos de Nuevu Roces, Miguel Bernardo, recordó otres reivindicaciones: el barriu «precisa dos servicios básicos, que son un consultoriu médicu y un colexu». «Espero que con esti gobiernu que nos escucha, sían llueu una realidá y que esta pasarela suponga pasar a otru estadío», añedió.
González respondió qu’asume diches pidimientos yá que, dixo, «esta zona tien que tener tou lo suficiente pa vivir bien». «Non solo esos dos servicios, sinón tamién munchos otros necesarios», afondó sobre los sos planes pa Nuevu Fregadures.
Y, como símbolu d’esa llucha del barriu, Miguel Bernardo apurrió una camiseta a l’alcaldesa na que rezaba: ‘Nuevu Fregadures tamién ye Xixón’. Tamién allegaron al actu los conceyales Dolores Patón y Olmo Ron.