L’históricu autobús de EMTUSA, instaláu en Poniente como puntu d’información de forma temporal, ensin refugase volvelo permanente
Noticia publicada nel diariu El Comerciu’l miércoles 26 d’agostu de 2020
Marla Nieto/Juan Carlos Tuero
A un neñu pónse-y un autobús antiguu a cuerpu de sablera y prefier dir caciplar l’interior del mesmu que ponese a faer castiellos de sable. Eso demostróse ayeri na primer xornada en que ‘Pegasín‘, el bus Pegasu 6035-A de EMTUSA, tuvo en Poniente. Decenes de neños fueron colos sos padres pa ver cómo ye esti retruque del que circuló pela ciudá ente los años 60 y 80. «Estrenamos con un monón de families. Munchos padres esplicaben a los sos fíos cómo yera dir xubíu nesti autobús cuando ellos yeren nuevos», aseguró Ítalo Ribeiro, unu de los encargaos de controlar les entraes y salíes de los visitantes.
Pero la función de ‘Pegasín’ nun ye a priori entretener a quien pasien pela zona, sinón funcionar como puntu d’información turística: «Nesta dómina, el puntu de Infogijón de la Escalerona ta a tope y solo atiende una persona y el qu’hai en casa Paquet, sicasí, tien menos arribación polo nuevo que ye. Por eso decidió habilitar esti otru puntu», acotó Ítalo.
Pela so parte, el director de la área de Turismu de Divertia, Daniel Martínez Junquera, apuntó que «el xixoneses saben de sobra qu’en casa Paquet hai un puntu d’información, pero ye bien recién, y los turistes emponer por geolocalización pa saber onde tán los puntos informativos».
Amás, dixo que ‘Pegasín’ ye un puntu temporal», pos agora cola COVID, al tener qu’esquiñonase la sablera San Llorienzo, «munchos van pa Poniente, asina que consideramos que yera bonu asitialo ellí. Nun refugamos que pudiera faese fixu, pero enagora non».
Luismi Alonso ye otru de los emplegaos de Infogijón, él concretamente de Casa Paquet. Allegó a Poniente pa visitar a Ítalo y a David López, emplegáu que s’encarga d’apurrir el material a los turistes. Toos ellos coinciden en que «anguaño’l perfil ye claramente nacional». Ayeri, dixo López, pasaron «munchos madileños y vascos».
L’históricu autobús va permanecer abiertu pal so esfrute hasta’l 13 de setiembre, n’horariu de 11 a 20 hores.