Dos añu de gobiernu conxuntu nel Conceyu de Xixón ente PSOE ya IU que s’axuntaron pa faer el siguimientu a metá del mandatu del so alcuerdu de 88 midíes pa la ciudá. La conclusión, siguir trabayando pa diseñar propuestes de futuru pa diseñar el Xixón de 2030.
Asina lo señalaron el secretariu xeneral de l’agrupación municipal socialista de Xixón, Iván Fernandez Ardura, y el coordinador local de IU Xixón, Faustino Sabio, en calteniendo una xunta de siguimientu del alcuerdu de gobiernu que dexó a PSOE ya IU recuperar l’alcaldía de Xixón tres ocho años de gobiernu de Foro. Na xunta tamién tuvieron presentes l’Alcaldesa de la ciudá, Ana González Rodríguez, el secretariu d’organización del PSOE, Roberto Lena, la responsable de Política Municipal d’IU Xixón, Ana Castaño Rey y l’asesor municipal, Javier Suárez Llana.
Fernández Ardura afirmó que l’alcuerdu ta funcionando “bien” y hai “muncha sintonía” tanto a nivel d’equipu de gobiernu como de les dos formaciones polítiques que dieron amueses de cómo pueden aunise esfuerzos en beneficiu de la ciudadanía.
El secretariu xeneral aseguró qu’en dos años desbloquiáronse temes importantes y creáronse idees de futuru pal diseñu de Xixón de 2030 como la reforma de la fachada marítima o del Muriu de San Llorienzo.
El coordinador de IU Xixón, Faustino Sabio, aseguró que l’alcuerdu ta cumplíu “bien percima del 50%” a pesar de les disfunciones económiques” xeneraes poles ayudes pa desaniciar la crisis.
Amás, aseguró que d’equí p’arriba se van a “multiplicar” los ritmos de trabayu y vanse a desenvolver reformes cola visión del Xixón de 2030 a la que se suman iniciatives como’l vial de Jove.
De cara a la próxima xunta, PSOE ya IU van desenvolver un nuevu métodu de trabayu pa poder plantegar propuestes de futuru que puedan financiase gracies a los fondos de recuperación europeos.
“Salimos d’una situación de murnia y cierta escuridá”, señaló Sabio, qu’afirmó que les formaciones encaren esta segunda parte del mandatu dende un planteamientu de gobiernu sensatu” y ensin aburuyes frente a otros modelos nos que paez qu’hai “abondo bronca”.
Sabio aseguró que la relación escarez de resfregones, tamién nel ámbitu del plan de víes onde PSOE ya IU son xuna “pareya bien avenida”.
A esti respectu, Fernández Ardura defendió l’apueste del gobiernu por allugar la estación intermodal en Moreda, xuna opción “realista” afecha a les circunstancies actuales frente a la opción del Muséu del Ferrocarril que llevaba a un caleyón ensin salida”.EFE