Xixón, 24 ago (EFE).-
El concursu internacional dos estrelles d’hípica que se diba a celebrar esta fin de selmana en les instalaciones del Club Hípicu Ástur de Xixón foi suspendíu tres l’apaición d’un biltu con 8 positivos na redolada d’un caballeru madrilanu que participó n’otru concursu previu, ente’l 14 y el 16 del presente mes.Según indicó’l conceyal de Deportes del Conceyu de Xixón José Ramón Tuero, el primer positivu foi’l del fíu d’un caballeru qu’asistió a una fiesta fora de les instalaciones hípiques y que se supo una vegada que l’afectáu yá tornara a Madrid, y col pasu de los díes detectáronse otros siete positivos na so redolada.”Foi un actu d’irresponsabilidá per parte d’un mozu” indicó Tuero qu’aportunó en que “nestos momentos nengunu de los positivos ta n’Asturies”, pero tres una xunta esta mañana cola Dirección Xeneral de Salú Pública del Principáu d’Asturies decidióse que lo más fayadizo yera suspender el concursu previstu ente’l 27 y 30 del presente mes.Tuero aportunó en que “nel concursu cumplióse a raxatabla el protocolu” y tamién qu’a Salú Pública plantegáronse-y delles alternatives pa salvar el concursu como que se fixera ensin públicu o efectuando test rápidos, posibilidaes que fueron refugaes.Pol mesmu motivu tampoco se va llevar a cabu’l Campeonatu d’España de productos nacionales y yeguaes que se diba a celebrar a finales de setiembre y ta en dulda un campeonatu d’atletismu n’ochobre.Pela so parte el presidente del Club Hípicu Ástur Jesús Kocina quixo dexar claro que “l’andada ye ayenu al club, anque foi ente persones qu’asistieron al concursu” y destacó que “nun hai nengún asturianu arimáu”.Para Kocina, “lo peor nun ye’l dañu económicu sinón el d’imaxe y entiende que la Dirección Xeneral de Salú Pública “nun quiera asumir riesgos”.Dende esti organismu encamentar al Conceyu de Xixón qu’enagora nun fixera nengún eventu nel que viniera persones de fora de la rexón.