Noticia publicada en La Nueva España’l vienres 9 d’ochobre de 2020
El Conceyu acomete la reforma de les redes básiques del edificiu de La Calzada, que va acoyer aules amás del complexu para pelegrinos
R. Valle 09.10.2020 | 01:16
La conversión del edificiu de Vicasa nel futuru albergue de pelegrinos de Xixón va suponer un costu de 1,4 millones y dos años y mediu de trabayu, según les primeres estimaciones del gobiernu municipal qu’espublizó énte’l Plenu’l conceyal de Turismu, Santos Melandru. L’albergue solo va ocupar xuna parte del edificiu construyíu como espaciu d’oficines y viviendes del personal directivo de Xixón Fabril a principios del sieglu XX. El restu del inmueble, qu’hasta agora yera un centru de formación xestionáu polos sindicatos, va ser utilizáu pola Axencia Local d’Empléu p’actividaes de formación
Camudar d’actividá supon tamién encarar l’arreglu d’un popular edificiu de La Calzada, allugáu na cai Les Industries, al llau del gran complexu comercial y d’ociu del barriu. Un inmueble con un nivel de protección integral dientro de les fiches reservaes al patrimoniu industrial del Catálogu de Xixón.
Los trabayos preliminares pa la reforma del edificiu yá tán en marcha. El Conceyu acaba de licitar un plan d’obres qu’afecta a la instalación eléctrica de baxa tensión, les instalaciones térmiques, la instalación de protección contra quemes y el sistema anti-intrusión. El presupuestu de gastu autorizáu ye de 233.177 euros, impuestos incluyíos, estremaos en trés partíes. Daqué más de 70.000 euros pa la parte eléctrica, otros 21.000 pal equipamientu contra quemes y alredor de 138.000 euros pa la instalación térmica.
Los trabayos definíos pola firma ProyectAstur Inxeniería inclúin ente otres acciones: xuna reforma integral de la instalación eléctrica dende la caxa xeneral de protección hasta los puntos de consumu, nuevu llume, l’allugamientu de proyeutores de tecnoloxía led, el cambéu de l’actual caldera de calefacción de gasoil por una de gas, la incorporación d’un sistema de renovación del aire, cambeos na señalítica de los percorríos d’evacuación en casu de quema, dotación d’estintores en zones de riesgu especial y un circuitu zarráu de televisión pa cuestiones de seguridá.
El contratu inclúi un informe del arquiteutu Roberto Terán pa garantizar que los trabayos nun afecten elementos protexíos. Terán incorpora a les sos conclusiones el pidimientu “como gran meyora pa la estética del edificiu” de retirar el cartelu asitiáu na parte cimera del accesu al patiu central onde s’anuncia como Centru Sindical de Formación. “Esi cartelu desvirtúa el conxuntu arquitectónicu na parte más bella y representativa del edificiu”, sentencia Terán.