Saltar al contenido

Xixón amuesa n’Europa’l so compromisu cola igualdá

El Conceyu de Xixón amuesa’l so compromisu nel ámbitu de la igualdá dientro de la campaña ‘’Ciudaes Inclusives para toos y toes: Derechos sociales na mio ciudá’’ que llanzó la rede de ciudaes europees Eurocities.

Les ciudaes participantes tienen de manifestar el so sofitu a dalguna de les secciones qu’integren la Pilastra Europea de los Derechos Sociales, un documentu que foi aprobáu en 2017 pol Parlamentu Européu, el Conseyu Européu y la Comisión Europea, y que nació coles mires de fortalecer los valores de la Unión Europea al traviés de la promoción de los derechos sociales y la llucha contra la discriminación y esclusión social. L’oxetivu de la iniciativa de Ciudaes Inclusives ye, a última hora, visibilizar la contribución que se desenvuelve a nivel local para construyir una Europa más inclusiva.

D’esta miente, Xixón axúntase a la iniciativa coles distintes acciones desenvueltes en materia d’igualdá y col compromisu d’intensificar una acción tresversal que promueva un cambéu social a favor de la construcción d’un modelu de sociedá igualitaria na qu’homes y muyeres dispongan de les mesmes oportunidaes para l’efectivu exerciciu de los sos derechos. Otres 29 ciudaes, ente les que s’atopen Lyon, Viena o Bolonia, tamién sumaron yá los sos compromisos sociales.

Estes contribuciones van ser alzaes a la Comisión Europea al traviés de la mesma rede Eurocities de la que la nuesa ciudá forma parte dende 2012 y que, por casu, dexó la celebración en Xixón del alcuentru “Cooperation Platform”, el desenvolvimientu de distintos proyectos o la participación en foros temáticos como’l celebráu en payares de 2019 na Asamblea Xeneral sobre digitalización que cuntó cola participación de l’Alcaldesa de Xixón, Ana González Rodríguez.

La integración nesti tipu d’iniciatives dexa a les ciudaes l’intercambiu d’esperiencies, de conocencia y defínense como xuna fonte d’información directa de les polítiques europees.  Coles mesmes trátase d’una plataforma que va dexar participar n’otros ya iniciatives europees, contribuyendo con ello a xenerar un efectu positivu na vida de les persones y a sofitar la construcción de la Europa del Sieglu XXI, especialmente nos momentos d’inseguridá económica y social.