Xixón, 22 dic (EFE).- El plenu del Conceyu de Xixón aprobó esti martes la remunicipalización del Xardín Botánicu coles mires de devolver al organismu “la dimensión científica medioambiental que nunca tuvo de perder” mientres los años nos que tuvo integráu na empresa d’ociu Divertia.
Asina lo afirmó la concejala de Facienda y vocera del PSOE, Marina Pineda, qu’esplicó que la midida busca que’l Botánicu “dexe de ser un elementu de recaldación” que ye lo que, al so xuiciu, paecía que pretendía la so integración en Divertia en 2014 al pie de la sociedá mista de turismu y el Teatru Xovellanos.
“Damos un pasu para devolver al Botánicu la dimensión científica medioambiental que nunca tuvo de perder y dexar de ser un elementu de recaldación que ye paecía que ye lo que se pretendía con Divertia”, afirmó Pineda al respective de la propuesta que cuntó col votu a favor de PSOE ya IU, l’astención de PP, Podemos y Cs y l’oposición de Foro y Vox.
Pineda aseguró que’l Consistoriu nun buscaba aforrar dineru, sinón potenciar el valor medioambiental del Botánicu xuntu con otros elementos medioambientales de la ciudá y faer una xestión integrada.
L’equipu de gobiernu pretendía tener más avanzada la integración d’otros organismos y el resolvimientu del futuru de Divertia na actualidá, pero la pandemia afectó al procesu, esplicó Pineda.
Na so vez d’esplicación de votu, el conceyal de Ciudadanos Rubén Pérez Carcedo echó en falta un estudiu que respuenda por los beneficios de la dixebra a pesar de consideró que la remunicipalización del Botánicu ye “un pasu más na necesaria reestructuración del sector públicu” municipal.
“Nun tenemos nenguna garantía de qu’esti cambéu vaya a suponer beneficiu dalgunu para Xixón”, denunció’l voceru de Foro, Jesús Martínez Salvador, qu’acusó al equipu de gobiernu de dexar cayer al Botánicu.
Pela so parte, la vocera de Podemos, Laura Tuero, sofitó la disolución de Divertia porque “el modelu qu’esistía taba midiendo la cultura polos ingresos” cuando ye un derechu, pero pidió “planes sólidos y non incertidumes” sobro los procesos que trai dexar la sociedá solo coles competencies de turismu.
El so homólogu del PP, Alberto López-Asenjo, indicó que nun ve beneficiu nesti procesu y apuntó que, a pesar de que’l procedimientu ye acorde a la llei, “quiciabes se tea abusando de la considerancia de mediu propiu”.
A lo último, el voceru de Vox, Eladio de la Concha, opúnxose a la midida por que nun s’esplicó conveniente y por que nun constata que la xestión directa suponga beneficiu dalgunu pal Conceyu o los ciudadanos.
El plenu tamién dio’l vistu bonu al cambéu de l’aportación dotacional del Conceyu a Fundación Llaboral Centru d’Arte y a la encomienda de xestión del Principáu al Conceyu pa la prestación de los servicios d’ayuda a casa y teleasistencia pa persones dependientes en 2021. EFE