- Enmarcar nes convocatories del Ministeriu d’Industria para’l fortalecimientu de l’actividá comercial en zones turístiques, y sobro el desenvolvimientu de planes de sostenibilidá turística pa entidaes locales
- El presupuestu que suman estos dos proyectos supera los 4’5 millones d’euros
El Conceyu de Xixón presentó güei un proyectu a la convocatoria abierta pol Ministeriu d’Industria, Comerciu y Turismu, dientro de los Fondos Next Generation de la Unión Europea, pal fortalecimientu de l’actividá comercial en zones turístiques, denomináu ‘De compres en Xixón: meyora de l’actividá comercial en zones turístiques’, a desenvolver ente los años 2021 y 2022.
Esti proyectu, que va llegar a 400 comercios de la ciudá, pretende dar un impulsu al turismu de compres na nuesa ciudá y amontar el curiosu de les exes comerciales asitiaos nes zones de mayor arribación turística de Xixón. Con esti oxetivu proponen intervenciones empuestes a ameyorar ciertes cais comerciales, completando la peatonalización y l’accesibilidá de les mesmes, ya introduciendo señalización comercial y turística intelixente, qu’anime a los visitantes a combinar la visita y conocencia de Xixón, cola compra nos sos establecimientos más singulares.
Coles mesmes, van xenerase un conxuntu de rutes de compres nes que se van integrar comercios selectos, iniciativa sofitada por una web y xuna app específicamente dedicaes a esti fin. Coles mesmes va desenvolvese un plan de sensibilización sobro sostenibilidá, economía circular y llucha contra’l cambéu climáticu, y va emprestase asistencia técnica a los establecimientos comerciales, pa la implantación de planes y acciones de sostenibilidá, coles mires d’averalos a la certificación Biosphere Sustainable Lifestyle.
A lo último, va ufiertase un programa de formación n’idiomes (inglés, francés y alemán), en trés niveles, pa los establecimientos comerciales allugaos nes zones más turístiques.
El presupuestu d’esti proyectu ye de 555.852 euros, de los cualos el 30% va corresponder a l’aportación municipal y el 70% restante, con cargu a los fondos europeos.
Otru de los proyectos presentaos, tamién rellacionaos col ámbitu turísticu, ye ‘Xixón, identidá sostenible, sostenibilidá y digitalización’, un Plan de Sostenibilidá Turística en Destín, articuláu en cuatro exes que les sos actuaciones prioritaries tán empobinaes a consolidar Xixón como destín cultural ya intelixente:
Exa 1. Transición verde y sostenible. Empobináu a l’adecuación de caminos ya infraestructures y la restauración paisaxística d’espacios, obres y equipamientos. Inclúi l’adecuación de la salida oeste del Camín de Santiago en Xixón y la restauración ambiental y acondicionamientu pa usu turísticu de la fachada mariniega.
Exa 2. Meyora de la eficiencia enerxética. Escuerre la meyora na movilidá y caminabilidad del destín, y la contribución a la mitigación del cambéu climáticu. Incorpora la movilidá turística más intelixente y sostenible, y l’acondicionamientu y meyora de la eficiencia enerxética del Albergue de Pelegrinos.
Exa 3.Transición dixital. Busca la meyora de los procesos al traviés del usu de la tecnoloxía. Inclúi’l programa d’impulsu a la digitalización del sector turísticu, pa dotar al destín de ferramientes d’intelixencia empresarial y ameyorar la xestión y competitividá del destín y los sos servicios, según la creación de la Oficina de Turismu Intelixente, liderando un procesu de tresformamientu tecnolóxicu nel serviciu d’información turística, y l’aplicación de tecnoloxíes dixitales pal aprovechamientu turísticu del patrimoniu históricu de la ciudá, impulsando la digitalización de dellos museos con soluciones innovadores.
Exa 4. Competitividá. Entiende actuaciones pa crear y potenciar nuevos equipamientos nel destín y acciones venceyaes cola meyora constante de la xestión del destín. Inclúi la recuperación y acondicionamientu pa usu turísticu de los abelugos antiaéreos del cascu históricu como patrimoniu históricu de valor, y la xestión, siguimientu y evaluación del Plan, pa dotar al destín de los recursos necesarios pa la so execución y coordinación.
El Plan de Sostenibilidá Turística en Destín va tener xuna duración de 3 años, mientres el periodu de 2022-2024.
El proyectu cunta con un presupuestu de 3.997.925 euros y, nel casu de que sía aprobáu, va cuntar con una cofinanciación municipal del 30%.