Xixón, 21 jun (EFE).- Xixón va cuntar dende’l próximu mes de setiembre con una escuela de tenis, la primera n’Asturies, destinada a persones con discapacidá intelectual y que, col nome de 40 Iguales, forma parte del programa Mas que tenis que lleva a cabu Special Olimpics España en collaboración cola Fundación Rafa Nadal.
Esta escuela foi presentada güei nel Conceyu de Xixón pol conceyal de Deporte José Ramón Tuero, el director xeneral de Special Olimpics España Enric Blesa y la presidenta de Plena Inclusión Asturies, la organización que fixo posible l’apertura de la mesma en Xixón, Clara González.
Plena Inclusión Asturies ye la organización que representa nel Principáu a les persones con discapacidá intelectual o del desenvolvimientu y a les sos families ente que Special Olimpics apurre dende la so fundación nel añu 1968 oportunidaes d’inclusión al traviés del deporte.
Anque la escuela nun va empezar a funcionar hasta setiembre, yá cunta con 17 alumnos de diverses partes d’Asturies que se van poner a la s ordes d’Inés Veleiro Suárez nes instalaciones municipales del Centru Integráu de La Calzada.
Enric Blesa recordó que Special Olímpics y Plena Inclusión Asturies lleven collaborando dende va una década y resaltó como “el deporte ye un gran vehículu para llograr la integración y l’inclusión de persones con discapacidá intelectual”.