Saltar al contenido
Portada » Últimas Noticias » 12 d’agostu, Día Internacional de la Mocedá

12 d’agostu, Día Internacional de la Mocedá

Artículu publicáu nel diariu El Comerciu’l miércoles 12 d’agostu de 2020

Roberto Lena, secretariu d’Organización de l’Agrupación Socialista de Xixón/Xixón

Mocedá, la mera palabra llévanos a años tras con añoranza pero cola sorrisa fácil para quien vivimos un periodu de la nuesa vida llena de cambeos, tresformamientos, esperiencies y vivencies que nos moldiaron como individuos. A pesar d’ello, nun tenemos d’escaecer a otres y otros mozos que tuvieron, y por desgracia sigue asocediendo, una mocedá marcada pola precariedá nel empléu, polos problemes familiares, económicos o sociales. La mocedá de güei vivió dos grandes crisis mundiales, una económica y la sanitaria de 2020. Na primera d’elles les y los mozos, xuntu coles muyeres, vivieron un momentu marcáu pola falta d’oportunidaes y de futuru. La mirada del gobiernu popular de Mariano Rajoy, ayena a les sos necesidaes y les polítiques empobinaes más escontra los grupos de poder, llevó consigo una gran fienda económica, un remocicamientu de la probeza y un desencantu que fixo que nueses y los nuesos mozos con talentu buscaren, pola falta d’empléu, destinos alloñaos, xusto nesa edá onde la vida suelte dar el llugar nel que dibuxar el to futuru.

Nun podemos cometer los mesmos erros nesta nueva crisis que los tocó vivir, y que nos sigue cutiendo duramente. Y nun lo vamos faer porque les polítiques sociales” del gobiernu de Pedro Sánchez nun son les mesmes polítiques “non sociales” del 2008. Esti gobiernu mira para la mocedá al traviés de polítiques qu’integren oportunidaes por que la mocedá faiga la transición de la so formación al mercáu llaboral. Invierte en sectores como’l tecnolóxicu, científicu o medioambiental como elementos clave de sostenibilidá y desenvolvimientu. Lleva a cabu midíes que favorecen la emancipación al traviés de meyores para l’accesu al arriendu, o l’aumentu de viviendes de suelu públicu. Realiza acciones en pro al caltenimientu del mediu ambiente, heriedu que vamos dexar al dinos. A última hora, un gobiernu que sabe que la mocedá nun ye la sociedá de la mañana, ye la sociedá del güei, que precisa y precisa midíes afeches a les sos necesidaes pa evitar lo asocedío va años.

A lo último, nun quiero dexar d’estimar a la nuesa mocedá xixonesa’l so exemplu mientres el confinamientu. Precisamos esi comportamientu exemplar, precisamos que síais la barricada pa frenar el coronavirus, precisamos la vuesa implicación nesta llucha. Por suerte, anque sois menos propensos a los efectos d’esti virus que mata, nun podéis llevalo a les vueses cases onde güelos, madres, padres nun tienen yá la vuesa fortaleza física. El fechu de nun llevar puesta’l mázcaru puede llevar a la muerte de quien queréis y quiérenvos. Volvéi ser exemplares, volvéi faenos fuertes.