Comunicación del nuesu secretariu xeneral, Iván Fernández Ardura, con motivu del 129 Aniversariu de l’Agrupación Municipal Socialista de Xixón que celebramos el vienres 4 d’avientu de 2020.
El 4 d’avientu de 1891 constitúyese la nuesa agrupación, solo dolce años dempués de la fundación del Partíu Socialista Obreru Español en casa Llabra. Nesa constitución tenemos de recordar el llabor de Teresa Olay, Francisco Cadavieco y Celestino Fanjul, quien empezaron a arrobinar los ideales socialistes qu’años antes s’afiguraron nos puntos constituyentes del nuesu partíu. Un argumentario que puede resumise en daqué tan senciellu y tan complexu como ye “camudar la vida de les persones”.
Anguaño ye bien especial pola situación que tamos viviendo, pola pandemia qu’azota’l mundu, porque hasta los virus entienden de globalización. Nesti momentu tan críticu pa España, el nuesu partíu dio la cara, foi fiel a los principios a los que fai 142 años comprometieron les venticinco persones que fundaron el PSOE, y les que fai 129 años constituyeron la nuesa agrupación pa defender los derechos de les persones ensin distinción de clase o de poder. Esto ye lo que nos fai grandes como partíu.
Como partíu faemos grande a la nuesa ciudá. Los importantes cambeos que tresformaron Xixón llegaron gracies a polítiques socialistes, polítiques que pensaben na xente, n’ameyorar la so vida. Recordamos como yera esi Xixón gris, escuru, que Palacio empezó a allumar, que Tini tresformó, que Paz ameyoró, y, en consiguiendo recuperar l’alcaldía l’añu pasáu, Ana reinició dándo-y l’impulsu que FORO casi consigue parar.
La nuesa agrupación tamién sufre la pandemia col dolor de la perda de compañeros y compañeres por cuenta de esti virus malditu. Quiero recordar nestes llínees a caúna de les persones que nos dexaron n’anguaño. La vida ye lo más pervalible que tenemos y, poro, toles midíes pa protexela y caltenela son fundamentales si queremos siguir ganando como sociedá, si queremos ser una sociedá que curia ente toos y toes a caúnu de los sos componentes.
Dientro d’eses midíes ta la d’evitar lo más posible la interacción social, y más nestos meses. Por eso, tola fervencia que tenía l’agrupación nos últimos años modificóse buscando otres formes de siguir xenerando esa actividá, tan pervalible por que, quien formamos parte de la familia socialista, tengamos los foros y espacios pa falar, aldericar y apurrir, y pa siguir siendo esa agrupación que con tanta viveza trabaya. Tamos consiguir, reactiváronse los grupos de trabayu, les xuntes informatives, l’actividá habitual, tan necesaria pa volver ser esa única voz apinada de enriquecedores matices, calteniendo con estes actuaciones el nuesu compromisu cola militancia, verdaderu corazón del PSOE de Xixón.
Iván Fernández Ardura, secretariu xeneral AMSG