Noticia publicada en La Nueva España’l vienres 4 d’avientu de 2020.
El conceyal Olmo Ron garantiza l’entamu de 25 acciones del plan de barrios, que suman 1,5 millones n’obres en parques, víes y edificios públicos.
Son 25 actuaciones venceyaes al denomináu plan de barrios, que suman daqué más de 1,5 millones d’euros y que van arrincar primero qu’acabe l’añu. Esi ye’l compromisu presentáu ante los grupos municipales pol socialista Olmo Ron, na so condición de conceyal de Caltenimientu y Obres Públiques, y en respuesta a una entruga de Ciudadanos. Son actuaciones que la so execución ta garantizada yá que la so contratación foi tramitada y, por tanto, tán financiaes con cargu al préstamu concedíu anguaño por aciu remanente afectáu.
Tou ello supon que la so continuidá como obres tresañales nun va tener problemes magar la situación de prórroga presupuestaria cola que va empezar l’añu’l Conceyu de Xixón. Nun hai qu’escaecer que’l plan de barrios ye unu de los proyectos estrella presentaos por Ana González namás llegar a l’Alcaldía y primero que la pandemia camudar tou comprometiendo 44 millones a lo llargo de too el mandatu.
Pero ente lo que ta al volver la esquina destaquen los 600.000 euros d’esos 1.578.955 euros qu’algamen los proyectos numberaos por Ron que tán sol control del serviciu d’Obres Públiques de la so conceyalía. Son 200.806 euros p’anovar la cai Luis Braille n’El Natahoyo, 177.00 pa faer lo propio na cai Pablo Olavide d’El Llanu y 195.000 euros pa la meyora de cuatro caminos de la zona rural. El serviciu de parques y xardinos suma 481.375 euros en nueve actuaciones.
Solo en renovación de xuegos infantiles, allugamientu de xuegos pa mayores y l’equipamientu de calistenia vanse 250.000 euros. Hai una singular partida de 56.000 euros pa l’asistencia técnica que define les meyores a acometer nel parque d’Isabel la Católica. Igual qu’asistencia técnica ye, dica agora, el compromisu coles obres na cai de María Bandujo pola reordenación de Cimadevilla.
Y en un tercer paquete tán los 12 proyectos so la xestión del serviciu d’arquitectura y caltenimientu que suman 507.097 euros. Por cuantía económica destaca los 242.00 euros que se van pa faer realidá l’arreglu de la cubierta del Palaciu de Deportes de La Guía y 302.500 pa sustitución d’elementos nel complexu de piscines d’El Llanu.
Proyectos a puntu d’empecipiase
- Serviciu de parques y xardinos. Un total de 9 proyectos que suman 481.375 euros. Desglose:_equipamientu calistenia, renovación de xuegos infantiles y xuegos saludables (250.000 euros), meyores nel parque infantil de Cimadevilla (20.000 euros), asistencia técnica pa les meyores nel parque d’Isabel la Católica ( 56.681,16 euros), suministro moblame (15.443,33), restauración d’árboles singulares (39.251 euros), restauración de fontes y llavaderos (50.000 euros) y Arcu Medioambiental (50.000 euros).
- Serviciu d’obres públiques. Un total de 4 proyectos que suman 590.483 euros. Desglose: calle Pablo de Olavide (177.084,36 euros), calle Luis Braille ( 200.806,44€ euros), redacción del proyectu de reordenación de Cimadevilla (17.545 euros) y los caminos de Guerces, del Mataderu, del Fuerte y del Golf en Castiellu (195.047,20 euros)
- Serviciu d’arquitectura y caltenimientu. Un total de 12 proyectos que suman 507.097 euros. Desglose: el proyectu del Skate Park de Cimadevilla (15.858,72 euros), sustitución d’equipamientu nes piscines del Llanu (302.500 euros), cubierta del Palaciu de los Deportes (242.000 euros), asistencia técnica pa obres nel Atenéu de La Calzada ( 3.630 euros), asistencia técnica pa obres nel centru municipal d’El Cotu (7.865€euros), instalación de llámines solares nel centru municipal de L’Arena ( 1.814,65 euros), obres na see vecinal de Perchera ( 14.999,21 euros), puertes y ventanes na asociación vecinal de Portuarios (6.000 euros), adecuación del abelugu de Cimadevilla (30.000 euros), Antiguu Balneariu (54.430,71 euros), asistencies técniques pa escueles infantiles de nueva creación (50.000 euros) y moblame y xuegos infantiles en centros escolares (35.000 euros).