La Nueva España,22.06.2021
“Nenguna persona ye illegal, y tol trabayu de los políticos tien de dir enfocáu nesa dirección”. El Conceyu de Xixón celebró ayeri un actu pel Día del Refuxáu nel que se punxeron sobre la mesa dellos datos y realidaes sobro les persones que busquen un futuru meyor llueñe de la so casa, de les sos families y la so redolada, emburriaos por guerres y persecuciones de too tipu. Mientres l’actu quedó de manifiestu que, d’ente les víctimes d’estes persecuciones, “les muyeres son les más desfavorecidas”.
Por ello, entidaes como la Comisión Española d’Ayuda al Refuxáu sollertaron ayeri sobro unes cifres que nun dexen llugar a duldes: en xunu de 2020, según l’Altu Comisionado de les Naciones Xuníes pa los Refuxaos (ACNUR), “79,9 millones de persones abandonaren los sos llares por cuenta de la persecución, les violaciones de los derechos humanos y les guerres”, numberó Elena Muñoz na so intervención telemática. Enxamás s’algamara una cifra de proporciones similares, que prácticamente dobla la de fai una década, según conclúi l’informe, y tou ello en metá d’una pandemia que llindó enforma’l movimientu de los refuxaos: el 75 per cientu de los migrantes moviéronse dientro del so propiu país o como muncho a otros países estremeros.
Nel casu d’España, atendiéronse un númberu considerable de solicitantes de protección internacional (88.762), qu’asitien al país como’l terceru de la Unión Europea, tres Alemaña y Francia. Coles mesmes, producióse una notable axilización de la instrucción de los espedientes, que dexó resolver les solicitúes de 114 .919 persones. Sicasí, d’elles solo’l 5 per cientu llogró la concesión de la protección internacional, mientres el 60 per cientu quedó nel llimbu de la irregularidá y el 45 per cientu llogró una autorización de residencia por razones humanitaries.
Sicasí, l’informe presentáu recueye que la media comuñal de concesión de la protección internacional volvió asitiase nel 33 per cientu y “este ye l’oxetivu al que tien d’averase España”, sostuvo Muñoz.
L’actu tamién cuntó cola presencia de María Jackeline Coloraes y Dina Carmona, quien rellataron la so esperiencia como abelugaes, y de les concejalas de Cooperación pal Desenvolvimientu, Carmen Saras, y de Participación Ciudadana, Salomé Díaz. Foi un actu col que quixo ponese l’acentu na necesidá de “humanizar y acoyer, porque hai campu de meyora na protección internacional, ye necesariu añedir nuevos grupos d’atención”.