El martes 19 de xineru tuvo llugar una nueva Asamblea Abierta en formatu seminariu online para falar de los Presupuestos Xenerales del Principáu d’Asturies y la so importancia para’l desenvolvimientu de proyectos en Xixón
Barganal de 100 persones asistieron a esta actividá abierta entamada pola FSA-PSOE, en collaboración cola Agrupación Municipal Socialista de Xixón. Cuntó cola participación d’Ana González, alcaldesa de Xixón y Alejandro Calvo, conseyeru de Mediu Rural y Cohesión Territorial del Gobiernu del Principáu d’Asturies, moderaos por Iván F. Ardura, secretariu xeneral del PSOE de Xixón.
Tratar d’unos presupuestos escepcionales que lleguen nun momentu difícil, onde ye bien complicáu dixebrar lo urxente de lo necesario. Tratar d’un proyectu de futuru, de construcción colectiva qu’escuerre la llucha contra la desigualdá de les persones.
Ye’l presupuestu mayor de la hestoria; supon un gran esfuerzu pa una comunidá autónoma como la nuesa’l disponer de 5.237 millones d’euros, de los que 3.414 millones van destinar a polítiques sociales. P’Alejandro Calvo’l retu ye trabayar pa estos sirvan pa buscar soluciones a los problemes actuales xeneraos pola crisis sanitaria, al empar que dexen el desenvolvimientu de proyectos de futuru p’Asturies.
A nivel de Xixón, Ana González considera que nun ye fayadizu valoralos, como lo faen dellos partíos políticos, a nivel solu d’inversiones yá que los presupuestos destinaos a polítiques sociales van beneficiar al empléu, a la sanidá y a la educación na nuesa ciudá. Tamién beneficia a Xixón que’l Gobiernu rexonal incida nel desenvolvimientu de proyectu ensin concluyir como son la Zalia o’l Plan de Víes, que van repercutir positivamente na nuesa ciudá.
L’alcaldesa fixo una repasada por dalgunos de los proyectos que van empezar a desenvolvese llueu como ye la primer fase de l’ampliación del Hospital de Cabueñes, la reforma del consultoriu de Vega La Camocha, el nuevu consultoriu de Nuevu Roces o la reforma del centru de salú de La Perchera, que van ameyorar les nueses infraestructures sanitaries. A nivel d’educación, en collaboración col Gobiernu del Principáu, van acometese obres de meyora en centros educativos. Ta prevista la llicitación d’un centru educativu en Nuevu Roces. Ensin escaecenos del Centru d’Innovación de Formación Profesional, que va suponer convertinos nun referente a nivel nacional y européu, del proyectu d’ampliación del Parque Científico y Tecnolóxico Margarita Salas, del allugamientu en Xixón d’una Axencia de Ciencia ya Innovación, o’l desenvolvimientu d’una estratexa medioambiental, ente otros.