El pasáu llunes, la corriente d’opinión Esquierda Socialista, entamó un alcuentru telemáticu y presencial, con llimitación a 6 asistentes, col director xeneral d’Empléu y Formación del Gobiernu del Principáu d’Asturies, Pedro Fernández-Raigoso, pa falar del Pactu de Toledo y del futuru de les pensiones, asina del compromisu del partíu socialista pa faer del Sistema Públicu de Pensiones un sistema modernu que dexe la so sostenibilidá y garantice la calidá de vida digna a les persones.
Y el xueves tuvo llugar la primer xunta telemática d’un nuevu grupu de trabayu, el d’Idees y Alderique Políticu, dirixíu a militantes y simpatizantes menores de 35 años. La so finalidá va ser la de ser un puntu d’alcuentru nel que poder conocese, charrar y aldericar sobro distintes temes rellacionaes cola política y el puntu de vista socialista de los mesmos.
Nesti casu, el primeru de les temes propuestes foi de “Democracia, conceutu y cómo midila”. Afaer esti conceutu a la situación actual, faer de la democracia un sistema más participativu y l’importancia de formanos nel pensamientu críticu dende edá temprana, ente otres, son dalgunes de les propuestes apurríes por esti grupu nuevu.