Artículu d’opinión de Paz Fernández Felgueroso, ex alcaldesa de Xixón, incluyíu n’El Comerciu, el 23/05/2020
El llargu procesu de Xixón para esaniciar la so barrera ferroviaria, qu’empezó en 2002 y col que lleguemos hasta 2020, foi publicáu con detallada cronoloxía por esti diariu’l pasáu miércoles. Nun ye’l casu de repitir lo yá sobradamente conocío, pero sí de cavilgar sobro determinaes circunstancies del itinerariu percorríu.
Les circunstancies a les que me refiero son los cambeos nos alcuerdos recoyíos en socesivos convenios de la sociedá Xixón al Norte, suscritos poles trés alministraciones concerníes, Conceyu, Principáu y Ministeriu, y qu’especifico de siguío: Metrotrén hasta Viesques, estación intermodal na Güelga. Metrotrén hasta l’Hospital de Cabueñes y el Parque Científico y Tecnolóxico (estación semisoterrada en Moreda). Metrotrén ensin cambeos, estación soterrada en redol al Muséu del Ferrocarril.
El primer cambéu no alcordao vinu dáu por razones técniques derivaes de les característiques complexes del sosuelu del allugamientu primeramente decidíu, la plaza de la Güelga, y tamién, por cambeos nel trazáu del Metrotrén. Tou ello faía invidable la so construcción. De resultes del estudiu informativu plantégase como meyor solución mover la estación a Moreda, na redolada de l’actual estación provisional.
Xixón al Norte convoca por ello un concursu internacional que’l so oxetivu yera’l diseñu urbanísticu del espaciu ente la Güelga y Moreda, según l’edificiu de la estación. Cabo recordar, y asina lo publicar el Diariu El Comerciu, que’l proyectu ganador del arquiteutu Jerónimo Junquera, cola collaboración del arquiteutu xixonés Javier Fombella, recibió “aplausu unánime al diseñu de la estación semisoterrada de reconocíos arquiteutos xixoneses”, tal que recoyíen los titulares d’esti diariu, con espresiones baltes como, “ va inxerir na so redolada de forma discreta y ensin estridencies” ; “acopla los barrios de Moreda y el Polígonu” ;” diseñu con calidá” ;” imaxinativa, curiosa y técnicamente delicada” ; o “el diseñu tien calidá y blimes, abondo orixinales pa convertise en prototipu”.
En nengún casu pretendo faltar a la verdá, por ello nun puedo resalvar que non tou fueron parabienes pa esti nuevu allugamientu. Quien manifestaron la so oposición a la citada propuesta argumentaron que se perdía la centralidad y que’l semisoterramiento nun esaniciaba por completu la barrera. Ente que quien taben a favor del allugamientu en Moreda aseguraben que la centralidad consiguíase dafechu. Xuna centralidad que yera crítica pa los viaxeros de cercaníes y qu’optimizaba el Metrotrén y les sos paraes, y que tenía mínima importancia pa los viaxeros de llargu percorríu, que tamién podríen conectar col Metrotrén a la fin del so trayectu.
Adicionalmente argumentóse que s’asitiaba mas llueñe del centru históricu, pero más abargana del centru funcional , con barrios de gran población como El Natahoyo, La Calzada, Moreda y el Polígonu, y tamién teniendo en cuenta los nuevos desenvolvimientos urbanísticos del proxecto Plan de víes.
Y llegamos al tercer cambéu nos convenios y alcuerdos, el producíu en 2019, proponiendo’l cambéu d’allugamientu, unos trescientos metros escontra la Güelga, na redolada del Muséu del Ferrocarril. Xuna propuesta que cuntó col consensu de casi tolos grupos municipales y el sofitu social.
Convien igualmente recordar, llegaos a esti puntu, que’l conveniu, qu’establecía cifres estimativas de costos, probablemente alloñaes de la resultancia última, incorporaba’l precuru de tomar les decisiones finales, una vegada evaluáu l’estudiu informativu a tramitar pol Ministeriu, nel que se puntualizaren costos más afinaos, viabilidá, condiciones técniques y económiques o costos de caltenimientu. D’esta forma supeditábase la toma de decisión definitiva a la resultancia del mentáu informe.
Atopamos nun momentu d’especial relevancia pal largamente afalagáu proyectu de modernización de Xixón y de unes infraestructures acordes a la movilidá sostenible que tanto pedricamos. Y pa ello, disponemos sobro la mesa d’un
estudiu informativu del Ministeriu, que llueu va ser sometíu a información pública, y d’estudios técnicos complementarios. Nellos, refléxense considerancies y puntualizaciones sobro costos, incidencies, ventayes comparatives sobro los allugamientos Moreda y Muséu Ferrocarril, plazos y elementos del procedimientu alministrativu yá sacupáu y avanzáu en Moreda.
Concluyo cola mio modesta reflexón, y na mio condición de persona que siguió en primer llínea la metá del periodu rellatáu, considero que la necesaria reactivación de Xixón de la que tanto falamos nestos díes precisa que, cuanto antes y nos plazos más óptimos, llevar a cabu les cuantiosas inversiones públiques que suponen les obres de les estaciones del metrotrén y estación intermodal.
Avancemos como norte y propósitu de Xixón al Norte, avancemos por que meyora la nuesa ciudá, pa xenerar dende yá oportunidaes de trabayu, lluchando contra la lacra del feroz desempléu, y nesi propósitu, nun tengo dulda de que volveremos sumar, volveremos atopanos.