Noticia publicada en La Nueva España’l miércoles 18 de payares de 2020
Cuatro mil euros per entidá ye’l tope qu’afitó’l Patronatu Deportivu Municipal dientro d’una escepcional convocatoria d’ayudes pol covid-19, que se lleva a votación esti vienres na xunta rectora del Patronatu Deportivu Municipal col enfotu de ponela en marcha cuanto antes. Son 100.000 euros de recursos municipales para, esplicar na propuesta d’alcuerdu, “evitar qu’esta crisis sanitaria nun derive nuna desapaición de parte del texíu asociativo deportivu xixonés”.
El dineru movilízase al traviés d’una convocatoria de subvenciones en réxime de concurrencia competitiva abierta a entidaes de tolos deportes y en toles categoríes. Hayan o nun participaren primeramente na convocatoria ordinaria d’esa llínea d’ayudes (llínea 6) del Patronatu. Eso sí, nun pueden acoyese a la convocatoria aquelles entidaes que tengan a valir un conveniu nominativu col Conceyu.
Tocantes a los deportes la única esceición nesta convocatoria son el fútbol y fútbol sala, que la so convocatoria d’ayudes p’anguaño, con una dotación económica de 135.000 euros, cerróse xusto la selmana pasada ya incluyía yá elementos de ponderación rellacionaos cola pandemia. Voceros d’estos equipos denunciaren que los retrasos nel cobru de les subvenciones municipales d’años anteriores teníen-yos afogaos.
Cada entidá deportiva namá va poder realizar una única solicitú (un equipu de categoría absoluta) nuna sola modalidá deportiva. Al pie de la solicitú tendrán de presentar el balance d’ingresos y gastos de la entidá pa la temporada 2019/2020 y una relación d’equipos, competiciones y categoríes nes que participara na temporada. Tocantes a los criterios de puntuación, y no que tien que ver con equipos en competición oficial, va dase 5 puntos per internacional, 3 por nacional y 1 por autonómica. A ellos hai que sumar la puntuación alcanzada nos epígrafes de gastos de la entidá y gastos de personal. Como forma de pagu inclúyese la posibilidá de cobrar hasta 3.000 euros nun únicu pagu adelantráu.
Dende’l Patronatu que dirixe’l conceyal socialista José Ramón Tuero búscase dotar de lliquidez a los clubes y embrivir l’impactu nes sos arques de la perda d’ingresos pola cancelación o aplazamientu de competiciones oficiales ensin qu’ello amenorgara los sos costos.
Dineru. La convocatoria estraordinaria del Patronatu Deportivu Municipal tien una dotación de 100.000 euros. El tope d’ayuda per club ye de 4.000 euros.
Esceiciones. A esta convocatoria non pueden presentase los clubes de fútbol base y fútbol sala, qu’acaben de cerrar la so convocatoria específica, y les entidaes que tien robláu un conveniu nominativu con Conceyu o Patronatu.