- La Mesa Técnica encargada del siguimientu del programa alcuerda, amás, aumentar la posibilidá de compra de bonos per DNI, que pasen de 80 a 160 euros.
- El grau d’execución del programa Bono Xixón ye, a día de güei, del 60%
El Conceyu de Xixón amplía’l plazu de vienta y truecu de los bonos del programa Bono Xixón hasta fin d’esistencies o, a lo más, hasta’l 5 de xineru de 2022, dando respuesta d’esta forma a unu pidimientu treslladáu polos sectores integraos nesti programa a la Mesa Técnica, conformada por personal de Xixón Impulsa y los axentes sociales de la concertación (UGT, CC.OO y FADE).
Asina lo treslladó’l conceyal de Promoción Económica, Santos Tejón, na Comisión d’Urbanismu, Promoción Económica y Empléu, celebrada esta mañana nel Conceyu de Xixón.
Otru de los alcuerdos adoptaos pola Mesa Técnica del Programa foi ampliar la posibilidá de compra de bonos per DNI qu’hasta agora taba afitada en 80 euros y pasa a 160 euros.
El programa Bono Xixón llogró vender, a 16 de payares de 2021, un total de 97.800 bonos, con un importe total de cupones que xube a 1.515.405 euros, de los que les y los veceros apurrieron 917.654, ente que la bonificación municipal xubió a 597.751. Según estos datos, a día de güei, la execución del programa Bono Xixón ye del 60%.
Los períodos de lliquidación de los bonos trocaos nun entepasen nunca de siete díes, realizándose la remesa de pagos cada llunes y tomando los bonos trocaos na selmana natural darréu anterior (llunes a domingu).
A lo último, tamién se treslladó a la Mesa Técnica l’eleváu interés del programa per parte del sector del comerciu, nun produciéndose este mesmu efectu nel sector de la hostelería.