La concejala de Facienda nel Conceyu de Xixón, Marina Pineda, señaló esti martes qu’hai un total de 97 emplegaos que podríen presentase al plan de funcionarización, puestu en marcha para amenorgar la temporalidá.
Estes places entraríen dientro de la convocatoria de la Ufierta Pública d’Empléu, destinaes a aquellos que cumplan colos requisitos establecíos. Eso sí, matizó qu’anque haya 97 persones que puedan optar a esti plan, nun ye obligatoriu, polo que pueda haber quien prefiera nun faelo.
Asina lo esplicó na rueda de prensa posterior a la Xunta de Gobiernu local del Conceyu, na que s’aprobó’l Plan d’Ordenación de los Recursos Humanos 2021 y disponer la so publicación nel Boletín Oficial del Principáu d’Asturies (BOPA).
Este va marcar los criterios qu’han de rexir pa la selección y organización del personal para los próximos años. Pineda incidió en que pola edá media de la plantiya, van dase un bon númberu de xubilaciones que va haber que cubrir.
Amás, va sirvir como elementu para amenorgar la temporalidá y de cara a regularizar a interinos como funcionarios, nos casos que marca la normativa.
La Xunta Local, per otru llau, autorizó dar entamu a la contratación, por aciu tramitación ordinaria y procedimientu abiertu, el contratu de seguru a tou riesgu por daños materiales, de responsabilidá civil/patrimonial y de la flota de vehículos y embarcaciones del Conceyu, organismos autónomos y empreses municipales.
Este va ser por un plazu d’un añu, prorrogable hasta un máximu de 12 meses más, con un presupuestu base de llicitación de 1.459.000,00 euros, tando exentu de IVA.
AYUDES A FACHAES
Tamién se dio lluz verde a la concesión de subvenciones para rehabilitación de fachaes, a diez comunidaes de propietarios, por importe total de 609.928,88 euros.
Per otru llau, autorizóse la firma d’un conveniu de collaboración entre Unicef Comité Español y el Conceyu pa ratificar la renovación de la reconocencia a Xixón como Ciudá Amiga de la Infancia pal períodu 2021-2025.
Alcordóse, yá fuera del Orde del Día, aceptar la subvención del Serviciu Públicu d’Empléu del Principáu d’Asturies, por importe de 104.060,16 euros, pa cada unu de los proyectos del programa Nuevu Ocúpate’ 2021/2022 y aprobar les bases de selección de los beneficiarios, pal llogru del certificáu de profesionalidá.
El programa va empobináu a mayores de 16 y menores de 30 años, que nun remataren los sos estudios y nun trabayen. Los dos proyectos presentaos son: Llimpieza n’Espacios Abiertos ya Instalaciones Industriales y Llimpieza de Superficies y Moblame n’Edificios y Locales.
Tamién s’aprobó’l creitu necesariu pa les ayudes a los beneficiarios de les beques comedor del proyectu 11×12, pal cursu escolar 2021-2022, con un gastu envaloráu de 286.287,42 euros IVA incluyíu.
Coles mesmes, autorizóse’l trespasu de 8.617,32 euros del creitu sobrante na Llínea 4 de Cooperación al Desenvueltu a la Llínea 3, pa completar la mesma en visu a faer posible que toles solicitúes que cumplan los requisitos reciban subvención, y el trespasu de 10.833,56 euros a la Llínea 1 pa reforzar los proyectos a los qu’haya llugar d’alcuerdu al orde de prelación.