El Conceyu de Xixón tien previstu integrar les fundaciones municipales na estructura del consistoriu col fin de racionalizar y unificar la xestión de los servicios qu’empresten.
Asina lo afirmó la vocera socialista y concejala de Facienda, Marina Pineda, quien nel alderique del estáu del conceyu señaló qu’anguaño’l gobiernu cumplió’l compromisu de la meyora de la xestión económica col refuerzu de la intervención municipal y l’implantación de la fiscalización llindada.”
“Unu de los retos más importantes qu’encaremos ye’l del tresformamientu organizativa. Una alministración municipal que respuenda a les necesidaes y mires de la ciudadanía, un modelu de xestión sólidu y oldeáu, qu’integre la planificación estratéxica, la execución y l’evaluación de resultancies ye l’oxetivu al que respuende’l proyectu PERSONES que yá mentó l’alcaldesa. Un proyectu basáu na reflexón y l’analís de l’actuación municipal, asitiando’l focu nes necesidaes de les persones y buscando la eficiencia y meyora de la prestación de los servicios y actividaes municipales, creando valor públicu sostenible”, aseguró.
Pineda afirmó que yá empezó a analizar los procesos de trabayu para diagnosticar árees de meyora que contribuyan a l’axilización alministrativa y que va encetar tolos aspeutos de la xestión municipal, los procesos y procedimientos, la privacidá y seguridá de la información, la organización y los sistemes de provisión del personal municipal, l’accesibilidá de los servicios o la ellaboración de códigos éticos d’alministración y gobiernu, tollo a lo llargo de 2022.
Al mesmu tamién se trabaya na reorganización comprometida. A puntu de rematar la reestructuración de los servicios integraos na axuntadura que yera Divertia, l’analís de los ámbitos de la cultura y los servicios sociales va rematar nel primer semestre del añu que vien con una propuesta d’integración de les fundaciones municipales na estructura del conceyu, racionalizando y unificando la xestión de los servicios qu’empresten.
Consolidada la implantación d’esta primer fase ta previstu l’entamu de la segunda fase cola propuesta al plenu nel mes d’avientu de l’ampliación del réxime de fiscalización ya intervención previa llindada a les árees de personal, responsabilidá patrimonial y urbanismu. Coles mesmes l’executivu local trabaya yá na evaluación de riesgos que va dar llugar a la ellaboración d’un Plan de Auditoria nel primer trimestre de 2022 que va suponer l’aplicación efectiva d’un sistema de control financieru nel próximu exerciciu.
Tamién se ta trabayando na implantación de la contabilidá analítica y nes próximes selmanes van peracabase los centros de costos de tolos servicios municipales determinando el indicadores de cada unu cola previsión de tenela enllantada al rematar el primer trimestre de 2022. En materia de tresformamientu organizativa, l’analís de los ámbitos de la cultura y los servicios sociales va rematar nel primer semestre del añu que vien con una propuesta d’integración de les fundaciones municipales na estructura del conceyu, racionalizando y unificando la xestión de los servicios qu’empresten