Ana González: “La división sindical n’Arcelor Mittal nun ye bona para la negociación cola empresa”
L’alcaldesa de Xixón va caltener el xueves un alcuentru col presidente del Principáu, Adrián Barbón, para encetar la situación de la multinacional siderúrxica L’empléu va ser unu de los puntos a tratar nel Alderique sobro l’Estáu del Conceyu que se va celebrar esta selmana.
2020 déxanos xuna pandemia, dos estaos d’alarma, dos meses de confinamientu y el zarru de munchos establecimientos y comercios. Circunstancies que van marcar, ensin dulda, les intervenciones del Alderique sobro l’Estáu del Conceyu que’l Conceyu de Xixón va celebrar, de forma telemática, en dos sesiones: miércoles y vienres. Un añu malu, según l’alcaldesa de Xixón, Ana González, nel que dende’l consistoriu cerráronse files entorno a les pesonas más vulnerables y los autónomos de la ciudá. Ana González espera qu’en 2021 s’empiece a superar la crisis sanitaria y arranque el despegue económicu de dalgún de los sectores más castigaos poles restricciones del COVID-19.
L’empléu, les ayudes sociales, los incentivos a la hostelería y el pequenu comerciu, el programa ‘El mio Barriu’, les infraestructures o la prórroga presupuestaria van ser dalgunos de les temes a tratar nes dos sesiones nes que se va desenvolver el plenu estraordinariu.
Sobro l’empléu, l’alcaldesa de Xixón amosó la so esmolición pola situación que se ta viviendo estos díes na factoría d’Arcelor Mittal en Veriña. En zarru patronal dende’l pasáu xueves, 320 trabayadores tán agora mesmu de brazos cruzaos esperando que sindicatos y empresa lleguen a un alcuerdu. Ana González fixo un llamamientu a la unidá sindical y anunció que’l próximu xueves va caltener un alcuentru col presidente del Principáu, Adrián Barbón, pa encetar el futuru de la multinacional siderúrxica na rexón.