L’equipu de gobiernu local caltuvo esta mañana xuna xunta con representantes del Partíu Popular pa encetar la situación del plan de víes col oxetivu común de “pasar a l’acción pa intentar tener una estación cuanto antes”.
Per parte del gobiernu municipal, la xunta taba encabezada pola alcaldesa de Xixón, Ana González Rodríguez; la vocera, Marina Pineda; y los conceyales d’Urbanismu y Obres Públiques, Dolores Patón y Olmo Ron, respectivamente. Per parte del PP, el so presidente local, Pablo González; la vocera del grupu municipal, Ángela Pumariega; la concejala, Ángeles Fernández- Ahúja; y l’abogáu del partíu, Pedro Górriz.
Na xunta, que trescurrió nun ambiente de “cordialidá”, punxéronse sobre la mesa cuestiones determinantes nes que dambes partes coinciden, como la urbanización del ‘Solarón’, la comunicación de les zones esti y oeste de la ciudá, o la esmolición polos plazos, que va determinar la finalización de la Declaración d’Impactu Ambiental, anguaño en fase de redacción.
Coles mesmes, l’equipu de gobiernu comunicó al Partíu Popular que mañana se celebrará la primer xunta técnica col Ministeriu de Tresportes, Movilidá y Axenda Urbana, y tamién los informó de que l’oxetivu ye iguar cuanto antes un equipu con Ministeriu y Principáu de mano a buscar financiamientu.
El Partíu Popular va ser informáu de la resultancia d’esta primer xunta técnica nel próximu alcuentru, mientres el restu de grupos políticos de la oposición van ser informaos nuna comisión estraordinaria d’Urbanismu.