Noticia publicada n’El Diariu El Comerciu’l sábadu 21 de payares de 2020
Va Empecipiar 2021 cola mesma tresferencia de 15 millones qu’en 2020, anque preve alzala un 18% cuando puedan sumase los remanentes
17.822.000 euros. Ye la cuantía que’l fallíu anteproyectu de presupuestos recoyía como aportación directa del Conceyu a la Fundación de Servicios Sociales para’l próximu añu. Yeren 2.781.000 euros más de lo presupuestao para 2020, lo que representaría una medría del 18,5%. La prórroga, sicasí, va faer que tenga qu’empecipiar 2021 cola mesma tresferencia qu’anguaño: 15.040.700 euros.
El Conceyu remarca que, magar nun poder tresferir dende un principiu la cantidá total que-y solicitó la fundación, esto nun significa «que se vaya a paralizar nada», pos va poder dir trabayando dende xineru con esa aportación inicial. Dexará-y dedicar, ente otres partíes, 4,4 millones d’euros al serviciu d’ayuda a casa, 2,6 a beques de comedor y 1,1 a ayudes d’emerxencia, según atender la mayoría de los convenios de collaboración con entidaes sociales. Nel presupuestu prorrogáu tamién van dir 1.092.000 euros que nes cuentes de 2020 acutárense pa unes ayudes complementaries» que teníen de tomar el relevu de la renta social pero que les sos bases y finalidá concreta entá nun llegó a definise.
En cuanto sía posible la incorporación de los remanentes de tesorería, la intención del equipu de gobiernu ye incluyir nos cambeos presupuestarios que se van presentar al Plenu previsiblemente en marzu o abril los 2,7 millones adicionales que queríen habese incluyíu nel presupuestu.
«El compromisu ye claru. Vamos caltener les propuestes d’aportación a organismos autónomos y empreses públiques que teníamos enriba de la mesa», apunten dende la área económica del Conceyu con vistes a los futuros cambeos de la prórroga que, pel momento, va llindar a retrucar en tolos casos les mesmes tresferencies a entes municipales que s’aprobaron va un añu.
El Patronatu Deportivu Municipal, que vio cómo la covid obligába-y a cerrar instalaciones y amenorgar los aforos de los sos cursos y actividaes, va empecipiar 2021 con una aportación per parte de Conceyu de 8 millones d’euros, cuando aspiraba a una medría de 1,2 millones qu’agora nun va llegar hasta que s’aprueben los cambeos. Daqué similar va asoceder con EMTUSA, que solicitaba de les arques municipales 11.211.300 euros, frente a los 10.750.400 aprobaos originalmente pa 2020 -y a los que s’acaben de sumar 3,4 millones más poles perda de la pandemia, que’l Conceyu espera recuperar del futuru fondu estatal d’ayudes a les empreses locales de tresporte-.
Reserves propies de Emulsa
Tamién Divertia, magar qu’anguaño va trespasar yá al Conceyu los gastos que representa l’actividá del Xardín Botánicu, prevía ver amontada la tresferencia del Consistoriu en 500.000 euros (en 2020 fueron 7.487.100 euros), principalmente p’atender los compromisos adquiríos en materia de Turismu dientro del alcuerdu de concertación Xixón Reinicia. Y la Empresa Municipal de Vivienda esperaba sumar a los 5,2 millones de 2020 (qu’inclúin 4,1 p’ayudes al arriendu) otros 150.000 euros pal nuevu serviciu d’intermediación n’arriendos.
La Fundación Municipal de Cultura y el Centru Municipal d’Empreses nun aspiraben a amontar anguaño les tresferencies que reciben, de 11,5 y 1,1 millones d’euros, polo que la prórroga nun los va afectar. Tocantes a Emulsa, anque precisa 1,7 millones d’euros más qu’en 2020 pa gastos directamente rellacionaos cola covid (trabayos de desinfección de colexos y alquisición d’equipos de protección y productos desinfestantes), nun pidía al Conceyu más de los 18,4 millones del añu pasáu, sinón que va recurrir a les reserves voluntaries resultáu de los sos aforros d’años anteriores, que xuben a 16,5 millones d’euros.