Skip to content
Portada » Noticies » Salú y República

Salú y República

Carta d’Iván Fernández Ardura a la militancia.

Tamos viviendo momentos tremendamente complicaos, bien duros nel presente y complexos cara al futuru, y nestes situaciones, particulares y colectives, primero de too quiero valorar l’enorme esfuerciu de toos y toles trabayaores que nos curien, cúrennos, velen pola nuesa seguridá, y nos dexen disponer de los bienes de primera necesidá colos que pasar esta cuarentena, cola más importante de les conseñes: “Queda en casa”.
Quiero tamién aprovechar esta comunicación pa felicitavos pol vuesu comportamientu exemplar nel cumplimientu de les normes que nos van a dexar ganar al virus Covid-19.
Tamos confinaos, pero’l Partíu sigue tando con toos y toes vosotres, siguimos unviando puntual información de les iniciatives y midíes que les alministraciones y autoridaes sanitaries tán tomando pa encarar el mayor desafíu nel nuesu país en décades, llabor que nos fai tar arguyosos, pesie a les dificultaes nunca vistes.
Cola cercanía y esmolición que tien de tener siempre’l partíu, y más nestos momentos, caltenemos el contactu con les nueses y los nuesos militantes, especialmente colos de mayor edá, pa aseguranos de que tán bien y ayudar no que precisen.
Y cómo non, queremos conmemorar como tolos años el 14 d’abril y la II República. Los sos finxos ideolóxicos tamos viéndolos estes selmanes na ayuda desinteresada al compañeru, a la compañera, o na cotidianeidá n’ámbitos como la salú, la educación, o la cultura, pegoyos nos que se sofitaba la República, pegoyos nos que se sofita’l socialismu que tantu lluchó y sigue lluchando por ellos, y que güei vemos nel nuesu confinamientu, como verdaderes ventanes al futuru.
Julián Sanz del Río y Giner de los Ríos traxeron la Institución Llibre d’Enseñanza al nuesu país, inspiradora del programa educativu de la II República, que algamó democratizar la formación y la educación en toa España. Les xeneraciones del 98, del 14 y del 27 convivieron mientres una dómina que pretendía calar de cultura España. La República tenía l’oxetivu de superar les barreres de clase y poner les capes populares en contactu permanente cola cultura. La ciencia española surdió al par que la lliteratura y l’arte cola Edá de Plata, facilitando, col sofitu de la Xunta pa l’Ampliación d’Estudios ya Investigaciones Científiques (JAE), los medios pa les trayectories investigadores. Nos primeros años trenta, los llaboratorios, institutos, y publicaciones de la JAE yeren el máximu esponente del desenvolvimientu na ciencia española, trayendo la modernidá nes más variaes cañes del saber científicu
Nunca vamos saber a qué tuviera llegao esti país si esi camín empecipiáu cola República nun fuere desaniciau poles visiones fascistes del pasáu, alloñaes de la igualdá y la modernidá.
Güei, metanes esta complicada situación, tenemos de tornar la mirada a los valores qu’impulsó la República, y siguir alantre pa consiguir el país que queremos n’educación, n’investigación, en solidaridá, en cultura, n’igualdá, n’equidá, en modernización, n’europeísmu, en desenvolvimientu económicu, verdaderos pegoyos de la República, claves pa salir d’esta situación, nun futuru qu’albidramos cercanu.

Compañeros, compañeres, “Salú y República”.

X